Hotell vart miljøfyrtårn

Det opplyser hotelldirektør Erlend E. Lundblad i ei pressemelding. Tidlegare har dei to andre hotella til Fjordtind Hotels AS – i Ulvik og Eidfjord – fått same status.

Ordførar Torgeir Næss stod for overrekkinga av eit diplom frå Stiftelsen Miljøfyrtårn til direktøren fredag 3. november. Å verta miljøsertifisert heng høgt og er noko hotellet dagleg gjer sitt ytste for å oppnå, ifylgje Lundblad.

Etter opninga av «nye» Hardangerfjord Hotel i 2020 har verksemda lagt vekt på avfallsreduksjon og miljøvenleg avfallshandtering. Ein eigen avfalls- og ombruksinstruks skal leggja til rette for både tilsette og gjester.

Ein nyttar økologiske og kortreiste råvarer, sparar energi gjennom god planlegging og kjøper inn miljøvenlege produkt. Ifylgje innkjøpsinstruksen skal det ikkje kjøpast eingongsartiklar. Det vert gjort ein systematisk jobb for å redusera matsvinn. Hotellet gjer òg tiltak for arbeidsmiljøet.

Lundblad ynskjer leggja til rette for at gjestene kan velja grønt og bidra til ein berekraftig bransje. Det er busstopp rett utanfor hotellet, og gjestene vert oppmoda til å gjenbruka handkle. Dei vert tilrådde å gå tur, padla med SUP-brett og kajakk og sykla. Elbilar kan ladast nær hotellet.

Hardangerfjord Hotel set kultur og arv høgt og ynskjer at gjestene skal få oppleva lokalmiljøet i kombinasjon med berekraftige og miljøvenlege vanar, fortel Lundblad.