Hotell får ny sjef

Styrelem Håvard Skarnagel Hansen i Hardanger House Drift AS har leia prosessen med å finna ny leiar. Han fortel at Indrearne skal byrja i stillinga 1. februar. Oda Amelie Løberg Grimstad har hatt jobben sidan hausten 2021.

– Oda ville flytta til Bergen og har fått seg jobb der. Ho ønskte seg til eit større miljø, fortel Hansen.

Prosessen med å finna ny dagleg leiar har vore omfattande og grundig.

– Me hadde 36 søkjarar. Av desse vart fem vart kalla inn til intervju. Me hadde to intervjurundar og ein omfattande spørsmålsrunde der søkjarane måtte svara på korleis dei vil bidra til å løfta Jondal som destinasjon og Hardanger House som hotell, fortel Hansen.

– Spanande bakgrunn

Indrearne skilde seg ut med særleg gode svar. Det var også positivt at ho har erfaring mellom anna som bookingansvarleg på Thon Hotel Sandven, med sal og booking i Hardangerfjord Hotel. Dessutan har ho både arbeidserfaring og ei bachelorgrad hotell og reiseliv frå Sveits.

– Eg har sjølv studert hotellfag i Sveits, og veit at det er ei krevjande utdanning. Hardanger House strevar med å få positive tal. Me håpar Marita skal vera med og løfta Hardanger House til nye høgder, seier Hansen.

Hotellet med ni rom hadde i fjor 4,8 millionar kroner i omsetning og eit negativt resultat på vel 0,7 millionar kroner.

– Sakna bransjen

Indrearne fortel at ho ei stund trudde ho var ferdig med hotellbransjen.

– Eg har stort sett jobba i bransjen sidan eg var ferdig utdanna. Midt under koronapandemien bytte eg til ei trygg og god kommunal stilling. Men når ein har vore i hotellbransjen, ønskjer ein seg gjerne attende. Dessutan likar eg tanken på å vera dagleg leiar og få vera med og påverka drifta, seier ho.

Ho trur ho kan bidra med ein kombinasjon av hotellfagleg kompetanse, erfaring og lokalkunnskap.

– Hardanger House er eit lite og eksklusivt hotell. Det tykkjer eg er spanande. Her har ein ikkje fleire hundre rom å halda orden på. Eg veit ein del om kva som fungerer og kva som ikkje fungerer i hotellbransjen, seier ho.