Hole eiker stikk kjepper i hjula

Meir presist er det Statsforvaltaren som nyttar mellom anna eikene og kulturlandskapet som argument mot eit anneks og ein garasje paret på Mundheim ynskjer seg ved bustadhuset sitt ved Salbuvika.

I tillegg vil han nekta søkjarane å reisa eit naust med slipp som han meiner er i strid med byggjeforbodet og vil privatisera strandsona.

– Har teke omsyn

Huset til søkjarane er ikkje stort. Kvamme, tilsett i Equinor, arbeider ein del på heimekontor og ynskjer seg eit anneks med kontorplass og treningsrom.

Søkjarane meiner dei har lagt vekt på å ta vare på og pleia eikene på eigedomen, både tidlegare og i dei nye byggjeplanane. Dei har medvite plassert og forma annekset og garasjen med tanke på eikene. Til dømes er tiltaka plasserte lågt i terrenget.

Når det gjeld naustet og garasjen, er tanken å nytta tiltaka i turisme i samband med planlagd utleige av eit nabohus.

I samband med naustet meiner Kvamme og Håland at dei har teke omsyn til at ålmenta skal kunna ferdast i området. Naustet hindrar ikkje tilgangen til sjøen på skarva ved naustet, og slippen skal liggja i ei naturleg kløft som vert fylt med sjøvatn når det er flod. Området vert elles ikkje nytta av ålmenta, meiner søkjarane.

Dei påpeikar dessutan at naustet ligg i nærleiken av ein tømmerkai, og at det ikkje vil råka ferdsla meir enn det kaien gjer.

Ut i felten

Innvendingane frå statens mann har fått rådmannen til å tilrå avslag på søknaden deira om dispensasjon. Den negative innstillinga fekk planutvalet til å utsetja saka og reisa på synfaring 1. november, slik at søkjarane saman med konsulent Geoplan AS fekk presentera både byggjeprosjektet og argument for det.

Både bustaden og naustet ligg i landbruks-, natur- og friluftsområde i kommuneplanen frå 2019. Rådmannen minner om at planen er nokså ny, og meiner at ein dispensasjon både vil svekkja han som styringsverktøy og skapa presedens.

Naustet får eit bruksareal på 29 rutemeter, annekset på 43 rutemeter og garasjen på 86 rutemeter.

Rådmannen meiner tiltaka er godt tilpassa til terrenget, men at ein ikkje kan leggja vekt på dei private og personlege argumenta for utbygginga.

Planutvalet drøftar saka att tysdag 22. november.