Høie: Derfor må vi innføre nasjonale innstrammingar no

Regjeringa innfører koronainnstrammingar som gjeld i heile landet. – Det er nødvendig med strengare tiltak no, seier helseminister Bent Høie (H).

Høie understrekar at tiltaka som tek til å gjelde frå midnatt natt til torsdag og gjeld til 12. april, ikkje erstattar dei lokale tiltaka.

– Vi har varsla nasjonale innstrammingar viss smitten ikkje går ned. No må vi gjere det. Dei nye tiltaka gjeld heile landet, dei vil først og fremst opplevast som ei innstramming der smitten er låg, seier Høie.

– Smittetala ligg stabilt høgt, situasjonen har vorte meir ustabil, og vi ser utbrot stadig fleire stader i landet. Smittesporinga er under press i mange kommunar, seier helseministeren.