Høgt forbruk av kopar i oppdrettsnæringa
Kopar frå oppdrettsnæringa forureinar havbotnen under og rundt oppdrettsanlegg. Det er framleis manglande kunnskap om korleis det marine miljøet blir påverka.
Det skriv Havforskingsinstituttet (HI) i ei sak på nettsidene sine.
Kopar blir brukt for å hindre at nøtene i oppdrettsanlegga blir attgrodde av algar og skjel.
I risikovurderinga av norsk fiskeoppdrett har Havforskingsinstituttet sett på miljøeffektar av utslepp av kopar frå fiskeoppdrett. Både under oppdrettsanlegg og 30 meter utover, i overgangssona som strekker seg frå 30 til 500 meter og i fjernsona som er meir enn 500 meter frå anlegget.
– Nokre stader er konsentrasjonane av kopar i sedimentet under og i nærleiken av anlegga så høge at dei kan vere giftige for organismar, seier forskar Bjørn Einar Grøsvik i saka til HI.
Det er framleis manglande kunnskap om kor tilgjengeleg ulike koparformer er i sedimentet, og ein veit svært lite om konsentrasjonane av kopar i vassøyla. Det er òg behov for meir kunnskap om korleis koparen blir spreidd og fortynna rundt anlegga, og om kva artar og livsstadium som er mest sårbare for koparutsleppa frå oppdrett.
(©NPK)
