Høgre går ut av koalisjonen
Ap, KrF og Frp får ikkje selskap av H i fleirtalskoalisjonen i Kvam dei komande fire åra.
Denne veka trekte partiet seg ut og slutta seg til opposisjonen. Dimed vert ikkje den same koalisjonen som har styrt Kvam i fire år, vidareført.
Dei tre andre partia er enno ikkje samde om ein samarbeidsavtale. Vert dei det, vil partia ha eit knapt fleirtal med 14 av 27 representantar i heradsstyret.
Les også:
Vil granska omfang
Den viktigaste grunnen til brotet er at partiet ikkje fekk gjennomslag for å kartleggja trongen for effektivisering av den administrative drifta av Kvam herad. Målet er eit balansert forhold mellom administrativt og utøvande personell.
I ei pressemelding onsdag påpeikar leiar i Kvam Høgre, Arne Sandven, at slike prosessar i ei privat verksemd vert sette i gang av eigarane gjennom styret. I Kvam herad må det skje gjennom heradsstyret. Sandven meiner det er sjeldan administrasjonen sjølv startar slike prosessar, sidan det kan skapa interessekonfliktar.
Difor har H kravd at ein ekstern aktør skulle kartleggja behovet. Partiet ynskjer ikkje å utvida administrasjonen før kartlegginga er gjennomført. Vona var å få saka fremja i samband med 2023-budsjettet.
– Ville ha tydeleg avtale
Dei to andre hovudpunkta H ynskte, fekk partiet delvis gjennomslag for. Det eine var eit lokalt produksjonskjøken og det andre etablering av kommunale bustadfelt eller kommunal deltaking i private felt.
Likevel, etter «grundige vurderingar», konkluderte partiet med at hjartesakene ikkje ville ha kome godt nok fram i samarbeidsavtalen. Sandven seier det har vore viktig for H å få ein klokkeklar avtale med tydelege saker.
– Me vil bruka tida i opposisjon til å jobba knallhardt for våre veljarar, og for å sikra at Kvam herad vert styrt på ein ansvarleg, effektiv og transparent måte, skriv partiet.
Sandven understrekar at samtalane mellom dei fire partia har vore konstruktive, og at vona er framleis godt samarbeid mellom dei.
Ordførar Torgeir Næss (Ap) seier at han konstaterer at usemje om sentrale politiske tema ikkje lét seg sameina. Etter diskusjonar både mellom og i partia før og etter helga vart det klart at H ikkje vert med i dei vidare forhandlingane. For dei andre partia er vona å ha ein avtale klar før det konstituerande møtet i heradsstyret, fortel Næss.
Les også:
