Høge inntekter og korona gav pengar til overs i Vestland
Betra skatteinngang, høge kraftinntekter, statsstøtte til kollektivtransport og sparte kostnader på grunn av korona førte til eit mindreforbruk på 350 millionar kroner i Vestland fylkeskommune i fjor.
Pengane som vart til overs, kan Vestland no setje av på disposisjonsfond til vidare utvikling av fylket dei kommande åra. Også i fjor hadde fylkeskommunen eit monaleg mindreforbruk, då på 216 millionar kroner.
– Større økonomisk handlefridom styrkjer rolla vår som regional samfunnsutviklar. Dette skal komme innbyggjarane til gode i form av investering i viktig infrastruktur og gode tenester frå fylkeskommunen, seier fylkesdirektør Rune Haugsdal i ei pressemelding.
Fylkeskommunen hadde elles eit svært godt netto driftsresultat målt i forhold til driftsinntektene i 2021. Det var på 9,1 prosent, mot 7,4 prosent i 2020. Det tilrådde nivået for fylkeskommunane er på 4 prosent.
Vestland har likevel 14,4 milliardar kroner i gjeld og ei netto gjeldsgrad på 90,3 prosent. Dermed ligg fylkeskommunen godt over det tilrådde nivået for kommunesektoren, som er på 75 prosent.
– Med tanke på dei store investeringane Vestland fylkeskommune står framfor, vil veksten i lånegjelda vere ei hovudutfordring i tida framover. Det blir derfor avgjerande for den økonomiske handlefridomen vår å balansere denne veksten, seier fylkesdirektøren.
Dei samla driftsutgiftene i Vestland fylkeskommune var i 2021 på 13.246 millionar kroner, mot 12.650 millionar året før.
(©NPK)
