Ho er utseld for høgdosejod
Hendingane i Ukraina dei siste dagane har ført til at mange fleire har vorte merksame på at det er viktig å ha jodtablettar — jodix — i beredskap.
Dei er naudsynte ved radioaktivt nedfall forårsaka av ein atomeksplosjon eller ei atomulukke.
Apotekbransjen i heile landet er utseld for høgdosejodtilskot, seier dagleg leiar og farmasøyt Sidsel Rykken ved Boots apotek Linnea i Øystese.
Jod som kosttilskot er ikkje så konsentrert som jodix, og vil ikkje ha same verknad.
Auka på
Rykken vil ikkje seia at folk er redde, men veldig mange har vorte meir medvitne om tilrådinga om å ha jod i beredskap. Spørsmål om produktet har auka veldig på dei siste to–tre dagane, seier ho.
Nettapotek sel også jodtilskot, men om dei har det på lager, kan ikkje Rykken svara på. Grossisten hennar i Oslo ventar at jod kjem på lager neste veke. Så tek det eit par dagar før det er på lager i Øystese.
— Kva skal til før det vert naudsynt å ta jod?
— Til dømes ei atomulukke der ein er redd for at radioaktivt jod vert spreidd. Det er berre når styresmaktene seier at dei under 40 år skal ta jodix at det er aktuelt, seier Rykken.
Det som skjer når ein tek jodix-tablettane, er at jodet festar seg til reseptorane i kroppen og sperrar vegen for radioaktivt jod. Slik vert det radioaktive jodet ikkje teke opp og får såleis ikkje påføra kroppen seinskadar, opplyser Rykken.
Ikkje førebyggjande
Også Boots apotek Norheimsund er utselt for jod, opplyser farmasøyt Liv Margit Soldal Lillemoen. Det har vore ganske stor etterspurnad, fortel ho.
Det er nokre år sidan ein byrja å tilrå å ha jod i private beredskapslager. Målet er å hindra kreft etter eksponering for radioaktivitet. Det tek svært lang tid å utvikla slik kreft, som kan koma i skjoldbruskkjertelen.
Ein skal ikkje ta jod som førebyggjande medisin, opplyser Lillemoen.
