Ho er ny dagleg leiar i Helse i Hardanger

I om lag to år har Børve vore assisterande dagleg leiar i Helse i Hardanger (HIH). Etter å ha vore konstituert dagleg leiar sidan nyttår, gjekk ho 1. juni over i den nye rolla.

Ho erstattar Janiche Buanes Heltne, som bytte jobb etter jul. Heltne er no direktør ved NKS Olaviken alderspsykiatriske sykehus AS.

Lang fartstid

Børve fortel at det er ei stor glede å ta del i arbeidet til HIH, som ho omtalar som både spanande og interessant.

– Sjølv om me held til i vesle Øystese, så har eg tru på at det me gjer her, er stort både nasjonalt og truleg også internasjonalt, seier ho.

Sidan 1996 har Børve, som er utdanna sjukepleiar, jobba både direkte og indirekte innan fagfeltet. Dei siste 13 åra har ho arbeidd som leiar.

Børve har arbeidd både i kommunehelsetenesta, i den vidaregåande skulen og på sjukehus. I tillegg har ho studert pedagogikk og har ei mastergrad i organisasjon og leiing, fortel ho.

Hjelp til sjølvhjelp

Den daglege leiaren samarbeider i eit team på kring tretti fagpersonar. I gruppa er det både psykologar, ernæringsfysiologar, ulike legespesialistar som til dømes lungelege og psykiater, fysioterapeutar, farmasøytar, kiropraktorar og spesialsjukepleiarar. Ifylgje Børve er alle svært motiverte for å utgjera ein skilnad i pasientane sine liv.

– Folk er interesserte i å vera sjølvhjelpne. Me gjer det me kan for å leggja til rette for at dei kan vera det, seier ho.

Tenestene til HIH er retta mot fem ulike pasientgrupper med ulike kroniske lidingar. Sidan starten i september 2020 har over 350 pasientar nytta seg av tilbodet deira. Børve vonar å kunna trappa opp og ta imot endå fleire gjester.

Ifylgje Børve har tilbakemeldingane frå pasientane så langt vore gode, og teamet er nøgd med tenestene det tilbyr.

– Etter kvart har me fått mange tilbakemeldingar etter 12 månaders oppfylging, som har vore eintydig positiv. Og best av alt er at me har dokumentasjon på at det verkar og varar, hevdar ho.