Ho avløyser Martin Vik i Hardangerbadet

Anita Storemark har vore assisterande driftsleiar, men overtok i sommar mellombels som driftsleiar då Gunn Hilde Øymo sa opp stillinga.

No rykkjer Storemark opp og vert dagleg leiar. Ho erstattar Martin Vik, som har hatt posisjonen i mange år. Nokon ny driftsleiar skal ikkje tilsetjast, fortel den nye sjefen.

Storemark seier ho går til stillinga med audmykje og stor giv, og gler seg til å ta fatt med blanke ark.

— Det er viktig å gjera det du synest er skummelt. Kvar dag gjer eg noko nytt. Eg er sjefen og har ansvaret, men har med meg ein kjempeflink gjeng som stiller opp og har stor eigarskap til Hardangerbadet, seier ho.

Ser framover

Ho ser fram til ein kvardag med meir stabilitet og føreseielege vilkår etter at pandemien har sleppt det klamme taket som har prega verksemda i snart halvtanna år.

— I praksis får eg større økonomisk ansvar og rolla som gallionsfiguren. Til no har eg kunna skubba Martin framfor meg, seier ho.

— Er kvemmingane flinke nok til å bruka badet?

— Kvemmingane er kjempelojale, begeistra og støttande, og har trykt badet til sitt bryst. Økonomisk ser me fram til me får stabilitet og ikkje oppstart etter oppstart, men me skulle gjerne hatt litt betre likviditet, seier Storemark.

Ho varslar fleire nye tiltak og konsept der utgangspunktet er at eit bad fyrst og fremst skal tilby symjeopplæring. Mellom anna står symjekurs til vaksne som ikkje kan symja, krålkurs for ungdomar og livredningskurs på planen. Snart byrjar vasstilvenjingskurs for 1.—4. klasse og «ungdomsklubben» Fredagshype, tiltak som utløyser stønad via fritidskortordninga. I tillegg tilbyr badet både aquagym og aquajogging, som er spesielt gunstig for dei som har ymse belastingsskadar og treng skånsam trening.

Kunne vore verre

Dei såkalla vêrgudane har ikkje vore på Hardangerbadet si side i sommar, men Storemark seier at sommarmånadene likevel har vore overraskande bra. Mange nøgde turistar har vore innom. Hotellet har stort sett vore fullt, og gjestene der har ein tur i bassenga per dag inkludert i prisen. Dessutan har kiosken hatt god omsetning på grunn av nærleiken til stranda.

— Me har selt meir slush enn nokosinne, seier den nye sjefen.

Anlegget selde 5.737 enkeltbillettar i juli, som er om lag 1.400 færre enn i fjorårets stort sett grå juli. Til gjengjeld har august vore ein god månad, mellom anna på grunn av godt besøk i dei to finvêrshelgane med Øystese Eat Move Sleep Cup. Badediskoteket var veldig populært, fortel ho.

— Samarbeidet med cupen er fruktbart og skal perfeksjonerast til neste år, seier ho.

— I balanse

Etter krav frå heradsstyret har Hardangerbadet levert besøkstal og eit budsjett for 2022 som skal dokumentera at likviditeten er god nok. Budsjettet tilseier 16,1 millionar kroner i inntekter, mot 12,2 i år og 11,1 i fjor, og ei drift i balanse.

Talet på selde enkeltbillettar er auka frå 27.500 i fjor til 61.500 i 2022-budsjettet. På toppen kjem besøket til dei som har medlemskap. Dessutan er talet på hotellgjester auka frå 3.500 i fjor til 8.500 neste år.

Når underskotet for 2021 er gjort opp, skal selskapet ha brukbar likviditet gjennom året, opplyser Hardangerbadet AS i brevet til kommunen.

I ei pressemelding takkar styreleiar Dag Jarle Aksnes den avtroppande leiaren for arbeidet han har gjort for selskapet. Utan innsatsen hans hadde ikkje prosjektet late seg realisera, meiner styret.