Hjorten er truleg den mest talrike hjortevilt-arten i Noreg
Det er aldri før registrert så mykje hjortevilt i Noreg som dei tre siste åra. Årsaka er den kraftige auken i talet på felte hjortar, medan talet på felte elgar søkk.
På landsbasis har tal på felt hjort auka med 24 prosent dei siste fem åra, viser den ferske oppsummeringsrapporten frå Overvåkingsprogrammet for hjortevilt: Hjortevilt 1991–2021.
– I hovudsak er det menneske som styrer bestandsutviklinga ved jakt. Samstundes vil klimaendringar påverke hjorteviltet, der hjorten kjem sterkare ut enn elgen seier seniorforskar Erling J. Solberg i ei pressemelding frå Norsk institutt for naturforsking (NINA).
Auking i bestanden saman med klimaendringar kan også føre til at hjorten breier seg til nye område.
Hovudinntrykket frå jaktstatistikken er at elgbestanden er svakt redusert, og den same trenden blir reflektert i tal på elg som blir påkøyrd av bil og tog.
Hjortebestanden har auka, utan at det er tilsvarande fleire trafikkdrepne hjortar. Det har vist seg vanskeleg å snu denne negative trenden, trass i betydeleg bestandsreduksjon ifølgje Solberg.
Vidare understrekar Solberg at ei mogleg medverkande årsak er at bereevna til bestanden er redusert – ein situasjon som kan vera krevjande å snu.
Sjølv om talet på felte hjortar har auka, meiner forskarane at det blir skotne for få. Her er det viktig at hjorten blir forvalta som ein ressurs og ikkje som eit skadedyr, seier seniorforskar Vebjørn Veiberg i NINA i same pressemelding.
For å finne ein god balanse mellom hjortevilt og andre interesser i norsk natur må ein arbeide for at bestanden blir halden på eit moderat nivå. Høge bestandsnivå over tid er negativt både for hjorteviltet sjølv og andre samfunnsinteresser, understrekar Solberg og Veiberg.
(©NPK)
