Hjelper nokre, men ikkje beredskapshytte
Heller ikkje i år fekk Øystese Røde Kors Hjelpekorps fylkeskommunal hjelp til å byggja ny hytte i Hamlagrø, men naboklagar er ein større bøyg i prosjektet.
Søknaden var ein av 14 såkalla opne søknader til avdeling for kultur og folkehelse i Vestland fylkeskommune. Ordet «opne» inneber at søknadene ikkje sorterer under etablerte tilskotsordningar.
Framlegget frå fylkesdirektøren var å handsama alle likt og avvise alle som ein. Fylkespolitikarane ville det annleis. Dei meinte at det var rett å plukka ut seks av søknadene og løyve til saman 4,9 millionar kroner frå disposisjonsfondet til søkjarane. Beredskapshytta var ikkje mellom dei heldige, i motsetnad til til dømes Trond Mohn Games, VM i vektlyfting og verdscup i triatlon.
Framlegget vart fremja i fylkesutvalet 17. juni av Sigrid Brattabø Handegard (Sp) på vegner av Sp, SV, V, MDG, KrF og A, og fekk støtte også av dei andre partia i både utvalet og fylkestinget. Ettersom den fylkeskommunale nettspelaren for politiske møte ikkje fungerer i sommar, noko HF har teke opp med fylkeskommunen fleire gonger i juli, har det vore uråd å nyta argumentasjonen frå partia i ordskiftet.
Hjelpekorpset søkte om to millionar kroner. Budsjettet er på vel seks millionar kroner utan moms.
– Det er vanskeleg å seia kva totalkostnaden vert, for prisar endrar seg enormt i løpet av eit år, seier Andreas Jacobsen til HF.
Han er leiar i Øystese Røde Kors. Ifølgje Jacobsen er hytta halvvegs finansiert med eksterne kroner. Jacobsen fortel at hjelpekorpset har nok pengar til å setja i gang bygginga. Det som set prosjektet på vent, er klagar frå fleire hyttenaboar i dispensasjons- og byggjesaka etter eit politisk vedtak 8. mai. Desse klagane vert truleg handsama i haust.
Nær 4,5 år har gått sidan HF fyrste gong omtala planane om å byggja ny lagshytte. Opphavleg var planen å reisa hytta der den gamle – Dyrbu – står. Sidan er planane endra. No er vona å reisa hytta i området mellom Osen og Lii.
