HF byter både scene og drakt

I desember 2023 vart det klart at Polaris Media avslutta partnarskapen med Hordaland Folkeblad (HF). I nær fem år har selskapet levert mellom anna abonnementstenester, annonsesystem og nettside til avisa. Til saman 13 lokalaviser fekk den same beskjeden.

– Meldinga om avskjeden kom som lyn frå klar himmel, med eitt års oppseiing, fortel dagleg leiar og eigar i HF, Camilla Skaar Ljones.

HF er altså ikkje eigd av Polaris Media. Ifylgje Ljones var personvernreglar den oppgjevne årsaka til at selskapet ikkje lenger kunne levera system til HF. Dermed måtte avisa starta jakta etter nye samarbeidspartnarar.

Avslo Amedia-avtale

Fyrst på banen var mediekonsernet Amedia, som eig over hundre lokalaviser og har partnaravtalar med rundt tjue andre. HF-leiinga fekk omvising på hovudkontoret i Oslo i januar i fjor. Ljones takka etter kvart nei til tilbodet frå den norske mediegiganten, i motsetnad til enkelte av dei andre som mista avtalen med Polaris Media.

– Skulle me ha valt Amedia, måtte me ha gjort om på alt her, og det hadde nesten berre vore redaksjonen igjen. Det hadde i praksis ført til at me måtte ha sagt opp folk. Eg hadde kanskje ikkje hatt jobb sjølv eingong, seier Ljones.

Ein annan del av grunnlaget for avslaget er driftskonseptet til Amedia. Ljones fryktar kort sagt at avisa ville ha vorte pressa inn i ein uynskt måte å driva avis på.

Amedia ville levera alle tenester. Det betyr at annonsane ikkje lenger ville vorte produserte lokalt, medan tenester som kundesørvis, marknadsarbeid, rekneskap og løn ville ha vorte leverte frå andre stader i landet. Ljones trur lokal tilknyting og kunnskap framleis har ein verdi.

– Det kan godt henda det var idiotisk å seia nei til Amedia. Om me fyrst hadde gått inn der, kunne me like godt ha selt avisa. Det hadde vore vanskeleg å koma ut att, seier ho.

Deler system og erfaringar

Mentor Medier er eit anna mediekonsern som var tidleg frampå. Ifylgje heimesida legg selskapet vekt på kvalitet, mangfald og meiningsberande innhald. Selskapet har frå før hand om utgjevingar som Vårt Land, Morgenbladet og Dagsavisen.

I jakta på nye leverandørar har HF samarbeidd med mellom anna Vest-Telemark Blad, Os & Fusaposten og Hallingdølen. Eit samarbeid med Mentor Medier vart i fyrste omgang lagt til sides, men selskapet kom tilbake med ei ny løysing. Denne gongen samla selskapet fleire underleverandørar og sette saman ein pakke som avisene vart trygge på.

– Det har vore eit langt år med ei rekkje møte og diskusjonar for å einast. No skal me dela system og erfaringar. Det er ingen andre som styrer innhaldet vårt, seier Ljones.

Selskapet Mediaconnect skal levera abonnementssystem, medan Labrador Cms AS skal levera det redaksjonelle systemet der mellom anna nettsida er del av pakken. Mentor Medier skal administrera og vera ansvarleg for at alle systema «snakkar saman». Dette betyr ny programvare, nytt annonsesystem, ny nettside, ny app og nye informasjons- og kommunikasjonsteknologitenester. Økonomien til avisa vil framleis verta forvalta lokalt.

– Alle funksjonar me har kontroll på no, får me framleis ha kontroll på, seier Ljones.

Må laga ny brukar

Den nye nettsida vil truleg vera på plass 31. januar, medan ny app og ymse andre tenester etter planen vil verta sette i drift 4. februar. Papiravisa, som etter omlegging får litt annleis utforming enn i dag, vert laga med eit system frå den svenske leverandøren Roxen fyrste gong 7. februar.

Dei største endringane vil HF-lesarane merka på heimesida. Det kjem nytt påloggingssystem. Difor må alle oppretta ny brukar og laga nytt passord. Det nye abonnementssystemet vil ha fleire mogelegheiter enn det gamle. Dersom fleire i husstanden les avisa på nett, kan alle ha kvar sin brukar. Også betalingsløysingar med Vipps vil koma, opplyser Ljones, som oppmodar lesarane om å kontakta HF om dei har spørsmål eller treng hjelp.

Mykje skal på plass i dei nye systema. Mellom anna må alle gamle saker og biletarkivet med minst 53.000 bilete flyttast dit. Publiseringssystemet frå Labrador Cms vil ha kunstig intelligens integrert, samstundes som det opnar for enklare tilpassing av fontar, fargar, plassering og video.

– Nettsida me har i dag, fungerer greitt og er enkel i bruk for journalistane, men ho er for lite fleksibel. Me gler oss til å ta det nye systemet i bruk, seier Linga.

For papiravisa er det førebels ikkje planlagt endringar.

Dyrare, men billegare

HF var gjennom dei same prosessane i april 2020, då avisa inngjekk avtale med Agderposten, som seinare vart seld til Polaris Media.

Det nye partnarskapsbytet medfører økonomiske kostnader for lokalavisa.

– Det vert ein investeringskostnad no. Løysinga er noko dyrare enn henne me hadde, men langt billegare enn alternativet me avviste, seier Ljones.