Hevdar nydyrkingsfelt gjev vasstrøbbel

Dette kjem fram i eit brev Harris Advokater AS har sendt til Statsforvaltaren i Vestland og Ullensvang kommune. Brevet er sendt på vegner av Svein Jåstad, som eig ei hytte ved det nydyrka området, og ekteparet Ragnhild Jåstad Vågen og Kjell Jostein Vågen, som bur på nabotomta.

I brevet hevdar dei at Sverre Leo Handegard, som fekk løyve til å nydyrka det 12 dekar store feltet i mai 2018, har deponert stein og leirmassar på området før dette vart planert, dekt med matjord og dyrka. Dette hevdar dei har ført til at langt meir vatn finn vegen til deira eigedomar.

– Eit avfallsdeponi

Ifølgje brevet vart det køyrt inn over 220 lastebillass med massar. Jåstad og ekteparet Vågen meiner at massane ikkje vart naudsynte for å dyrka området. Sidan så mykje massar vart tilført området utan grunn, meiner dei at Handegard skulle ha søkt om løyve etter plan- og bygningslova. Dette har han ifølgje brevet ikkje gjort.

Ein del av massane er stein og morenemassar, men det skal òg vera tilført leire. Jåstad og ekteparet Vågen mistenkjer at ein del av massane er overskotsmassar frå andre anleggsområde. Slike vert definerte som avfall etter ureiningslova. Er massane å rekna som avfall, skal området definerast som eit avfallsanlegg og deponi. For å etablera eit slikt, treng ein særskilde løyve. Det har Handegard ikkje søkt om, hevdar dei.

– Fukt og sopp

Jåstad og ekteparet Vågen hevdar at etter nydyrkinga har eigedomane deira fått langt meir overflatevatn når det kjem mykje nedbør. Fleire stader har det dukka opp mystiske groper på bakkane rundt husa. Jåstad har dessutan fått påvist både fuktskadar, ekte hussopp og muggsopp i krypkjellaren på hytta.

Like ved feltet ligg også to gravrøyser som begge er automatisk freda kulturminne. Den eine stammar frå den yngre jarnalderen og den andre frå jarnalderen. Jåstad fryktar at desse skal verta skadde av vatnet.

Jåstad har leigt Norconsult til å undersøkja årsaka til dei auka vassmengdene. Konklusjonen til selskapet er at leira som vart tilført før feltet vart dyrka, har øydelagt den naturlege dreneringa. Dette gjer at meir vatn renn inn på nabotomtene i staden for ned i bakken. Truleg er også grunnvassnivået i området endra i periodar.

Ønskjer erstatning

Jåstad og ekteparet Vågen ønskjer at Ullensvang kommune og Statsforvaltaren vurderer om Handegard har brote regelverket. Om han har det, ønskjer dei at løyvet til nydyrking, som vart gjeve av Jondal kommune i 2018, vert trekt attende. Dei ønskjer at Handegard skal gjennomføra tiltak som gjer at det nydyrka området og nabotomtene vert skikkeleg drenerte.

Ifølgje Jåstad har dei vore i kontakt med Ullensvang kommune om dette fleire gonger dei siste åra, utan at det har ført til noko. Denne gongen har kommunen sendt eit brev til Handegard der han vert beden om å gjera greie for kva som er gjort på feltet.

Jåstad ynskjer at Handegard betalar utgiftene han har hatt i samband med fukt- og soppskadane på hytta.

– Eg kontakta Handegard med dette kravet. Det vart kontant avvist. I staden har Handegard hyrt sin eigen advokat. Det er no sendt eit prosessvarsel til Handegard, fortel Jåstad.

– Ingen kommentar

HF har vore i kontakt med Handegard. Han seier at sidan saka no er advokatmat, ønskjer han ikkje han å kommentera den.

Advokat Vetli Felland representerer Handegard. Heller ikkje han ønskjer å kommentera saka.

– Jåstad har teke Handegard inn for forliksrådet. Eg er samd med Handegard i at saka ikkje skal prosederast i avisa. Dette ein tvist mellom to naboar. Den tek me i retten, seier han.