Hestekrefter på Hardanger-visitt

Klokka 13.30 skulle nemleg gjengen i Eurorally Norway, som tel om lag hundre spreke sportsbilar, koma innom parkeringa ved Hardangerbadet. Dette hadde folk fått med seg, og mange stod klare i området ved rundkøyringa for å få synet av hestekreftene i aksjon. Fyrst klokka 14 dukka doningane opp litt etter litt.

Mobiltelefonar var å sjå overalt, og bil for bil vart foreviga på den digitale filmrullen. Sitringa, spesielt hjå den yngre garde, var godt synleg då dei som torde, demonstrerte kva som låg gøymt under pansera.

Ser etter vakre stader

Parkeringa vart etter kvart fylt med både bilar og folk. Mellom dei var Frank Øverland. Han er med i gjengen som står bak Eurorally, og har mellom anna ansvar for kommunikasjon.

– Kvifor vel de å stoppa akkurat her?

– Når noregsturane skal planleggjast, går ein inn i kartet og ser på punkt A og B, og ser kva som er vakkert mellom der. Alt her er vakkert! seier Øverland.

– Og samarbeid med kommunane er alltid ein suksess. Då får me lov til å «ta oss litt til rette», slik som her, seier han.

Bussparkeringa og området utanfor Hardangerbadet og Hardangerfjord Hotel var fylt opp. Det same var vegen langs Hardangerbadet og Hardanger Skyspace, og langs kyrkjegarden.

– Veldig sosialt

Det var flest menn i alle aldrar som stega ut or sportsbilane, men også kvinnelege sjåførar var å finna. I alle fall to. HF slo av ein kort prat Lisbeth Hansen og Monica Storhaug. I tillegg til dei er det éin til «rein jentebil» med, fortel dei.

Hansen og Storhaug kom køyrande i kvar sin Mustang over Kvamskogen. Løpet starta altså i Bergen laurdag morgon. Før det kom damene køyrande frå Stavanger, der dei held til.

Det er veldig sosialt, seier Hansen. Det er ikkje slik at alle kjenner alle. Ein vert kjend etter kvart.

– Det kjem folk frå alle slags stader, seier Storhaug.

Mange tilskodarar

Det er fyrste gong damene er med på Eurorally Norway, men biltreff har dei vore på før – mellom anna på Rudskogen i Rakkestad. Kvam baud både på regndropar og turt vêr då bilane var innom. Vêret har ein del å seia, vedgår dei kvinnelege sjåførane.

– Spesielt for oss som køyrer kabriolet, seier Storhaug.

– Får de mange kommentarar om bilane?

– Dei fleste berre ser og filmar, seier Hansen.

– Det har stått folk langs vegen heilt frå Bergen. Spesielt unge gutar står langs vegane og filmar, seier Storhaug.

– Held de fartsgrensa?

– Ja! kjem det kontant frå begge to.

– For guds skuld, ja! Me kosar oss på tur, seier Hansen.

Etter stoppet i Øystese gjekk turen vidare til overnatting i Eidfjord og avslutning i Vrådal i Telemark dagen etter.