Herandbutikk fekk alkohol-nei
Ullensvang-rådmannen nektar den nye butikken i Herand det minst 47 andre butikkar har fått løyve til: å selja alkohol i butikk utan bemanning.
Rådmann Ole-Jørgen Jondahl grunngjev vedtaket ved å visa til eit notat frå Helsedirektoratet. Der skriv direktoratet mellom anna at alkohollova ikkje opnar for salsformer der den som skal vurdera om kjøparen er ruspåverka, ikkje er til stades fysisk.
Rådmannen støttar seg òg på ei fråsegn frå skjenkjekontrollen i Kvam. Herand Landhandleri AS nytta same teknologi som Herand Handel skal nytta. Verksemda fekk løyve til å selja alkohol i ein prøveperiode. Skjenkekontrollen gjennomførte tre salskontrollar i butikken i 2021.
Sjølv om teknologien gjer at innehavaren via lyd og bilete kan kontrollera at kunden er gamal nok og ikkje er tydeleg rusa, har ikkje løysinga ei innebygd sikring som gjer at innehavaren må gjera dette, påpeika skjenkjekontrollen. Konklusjonen er difor at systemet ikkje stettar krava i lovverket.
Herand Handel har klaga på vedtaket. Saka er send til avgjerd hjå Statsforvaltaren i Vestland.
– Forskjellsbehandling
Audun Berg skal eiga og driva butikken saman med kona Bergljot Eiken Berg. Han fortel at verksemda først fekk løyve til å selja alkohol frå 08 til 20, men då dei i ein e-post presiserte at dei planla å lata butikken vera ubemanna i delar av opningstida, kom kravet om at salet berre måtte skje når butikken er bemanna.
Berg fortel at den såkalla RMA-teknologien som butikken skal nytta, ikkje gjer den ubemanna, men fjernbemanna.
– Det betyr at kundane som brukar butikken når det ikkje er tilsette til stades, alltid vil kunna kontakta dei tilsette via RMA-systemet. Inkludert i systemet er det ei løysing for sal av alkohol, seier han.
Han meiner at teknologien, kombinert med internrutinane butikken skal innføra, vil gjera butikken i stand til å retta seg etter krava i lovverket.
– Det er om lag femti butikkar i andre kommunar som nyttar same teknologi. Så vidt eg veit, har alle desse fått løyve til å selja alkohol. Difor tykkjer me det er urimeleg at me ikkje får lov, seier Berg.
Administrerande direktør Hans Olav Bakås i Mat-Norge AS, verksemda som leverer RMA-teknologien, stadfestar at i alle fall 47 butikkar har fått løyve til å selja alkohol sjølv når butikken ikkje er bemanna.
Ønskjer fleksibilitet
Folk i Herand treng uansett ikkje reisa ut av bygda for å få tak i alkohol. Den nye butikken, som opnar laurdag 25. mars, skal vera open frå 07 om morgonen til 22 om kvelden. Planen er at den skal vera bemanna frå 09 til 16 frå måndag til torsdag, frå 09 til 19 fredagar og frå 09 til 15 laurdagar.
– Dei som ønskjer å kjøpa alkohol, kan gjera det medan butikken er bemanna, men likevel øydelegg vedtaket litt av fleksibiliteten vår. Eit avslag vil dessutan skapa presedens for andre butikkar i Ullensvang som ønskjer å innføra same teknologi, seier Berg til HF.
