Herand er ikkje lenger butikklaus
Laurdag var det offisiell opning av den nye nærbutikken i bygda. Skal ein tolka talet på personar som fekk med seg opninga, er butikken kjærkommen.
Ein stor del av dei om lag to hundre innbyggjarane i bygda var å sjå i og rundt den nye butikken. Så mange hadde møtt fram at Bergljot Eiken Berg, som skal driva butikken med hjelp frå mannen Audun Berg, ikkje klarte å halda tårene attende.
På opninga heldt mellom andre ordførar Roald Aga Haug tale. Herand Musikklag spela og det vart smaksprøvar på diverse produkt. Og sjølvsagt kunne den som ønskte det, nytta opninga til handel.
Den obligatoriske snorklippen var det familien Berg sjølv som tok hand om. Sønene Jakob og Daniel heldt snora, medan ekteparet saman heldt saksa.
Ekteparet Berg innrømmer at butikken har hatt «prøveope» før den offisielle opninga.
– Me opna på torsdag, slik at både kundane og me kunne testa butikken, fortel Audun.
– Litt fornying
Dei nye eigarane har gjort litt med butikken før opninga.
– Me har bytt noko av utstyret med meir energivenlege modellar, og dessutan har me ominnreitt nok til å gje folk ei kjensle av at dette er ein ny butikk. Mellom anna har me flytta både den betente og den ubetente kassen, og så har me laga ein liten kafékrok, fortel han.
Kafékrok har dei òg planar om å laga ute.
Ekteparet fortel om travle dagar dei siste vekene.
– Men samstundes har det vore utruleg kjekt. Det gjev oss energi, og me har fått utruleg mykje positiv støtte frå folk i Herand. Dei har til og med delteke i dugnadsarbeid for å hjelpa oss. Det har vore uvurderleg, fortel Berg.
– God rente
Butikken er ein del av Snarkjøp-kjeda. Kjeda gjev stor fleksibilitet når det gjeld vareutval. Dei kan ta inn lokale produkt om dei ønskjer det, og tilpassa utvalet etter etterspurnaden i Herand.
– Me har fått god hjelp frå kjeda til å finna eit fornuftig grunnutval. Og så kan me ta inn ting som manglar dersom folk saknar noko, seier Berg.
Butikken har òg fått støtte frå Mercur-programmet, eit program som skal støtta butikkar på små stader. Ekteparet har dessutan fått eit lån frå bygdelaget i Herand med det Berg kallar svært god rente.
– Det har kosta litt å starta butikk. Ikkje minst kostar det å kjøpa eit komplett varelager. Utan eit lån med gunstige vilkår hadde ikkje dette gått, seier han.
Teknologi gjev fleksibilitet
Butikken nyttar såkalla RMA-teknologi frå Mat-Norge AS. Teknologien gjer at verksemda kan vera ubemanna deler av opningstida.
– Til å byrja med var me litt skeptiske til å lata butikken vera ubetent. Heile konseptet kjendest litt sterilt. Sidan har me snakka med mange som har brukt teknologien. Det gjorde at me endra meining. RMA-teknologien gjev kundane langt større fleksibilitet. No kan kundar med lange arbeidsdagar stikka innom og kjøpa det dei manglar på kveldstid. Statistikk tyder på at mellom 20 og 30 prosent av omsetninga i butikkar som har slik teknologi skjer når den er ubemanna, seier Berg.
– Attende til røtene
Korkje Bergljot eller Audun har erfaring med butikkdrift. Ho har jobba mange år i barnehage, medan han er ingeniør i Equinor ASA. Både Snarkjøp og representantar frå Mercur-programmet har vore hjelpsame og gjeve råd om butikkdrift.
Dei neste månadene har familien tenkt å pendla til Herand, men til sommaren er planen at dei flyttar til bygda.
– Kvifor kjøpa butikk i Herand?
– Bergljot kjem frå Herand, og me har alltid brukt mykje av fritida vår i Herand. Under pandemien gjorde bruk av heimekontor at periodane i Herand vart lengre. Me merka at minstemann byrja etablera nettverk her. Då butikken vart lagd ut for sal, såg me på dette som ei moglegheit til å flytta attende til røtene, fortel Berg.
