– Her stemmer ikkje liv og lære
Avslaget frå Helse Vest til Helse i Hardanger (HH) er hårreisande, meiner Sveinung Hole. No ber han næringsminister Jan Christian Vestre (Ap) om å vakna.
– Skal me lata eit gryteklart innovasjonsprosjekt med fabelaktige resultat for alle partar gå i oppløysing fordi det ikkje høver inn i eit skjema i eit anbodsdokument? spør Hole i eit brev til ministeren.
Hole er leiar av Sarsia Management AS, ei verksemd som investerer i forskingsbaserte helseinnovasjonar. Tidlegare har han vore styremedlem i Helse Bergen HF og leiar av Trond Mohn forskningsstiftelse, for å nemna noko.
Hole reagerer kraftig på det han meiner er ei uansvarleg handtering av HH. Verksemda fekk i haust avslag frå Helse Vest. Helse Vest konkluderte med at tilbodet frå HH ikkje var attraktivt nok. Handteringa er i strid med alle formuleringar i oppdragsdokumentet til Helse Vest, og i strid med all fornuft, hevdar han.
I midten av mars gav helseføretaket opp kampen. Tilsette vart permitterte og husleigeavtalen sagd opp.
Trongen for innovasjon i helsetenestene er stor, og det offentlege anbodet er sjølve brua for å kunna implementera innovasjonen og betra tenestene. Det er ikkje døger eller dagar, men pasientar som skal behandlast, påpeikar Hole.
– Me får altså tre gongar så mange pasientar behandla på denne måten, skriv han til ministeren.
Å lata HH gå i oppløysing tek vekk motivasjon for å jobba med innovasjon i helsetenestene. Om avgjerda vert ståande, spelar det beviseleg inga rolle å lukkast, meiner Hole.
– Det er hårreisande.
Også Stener Kvinnsland, tidlegare styreleiar i HH, har teke kontakt med regjeringa. 23. mars sende han ein e-post til tidlegare helse- og omsorgsminister Ingvild Kjerkol (Ap) med ei framstilling av historia til HH.
– Eg meiner bestemt at det me har oppnådd, kunne ha bidrege til ei vitalisering av tilbodet til pasientar med kroniske og samansette lidingar, med potensielt svært store gevinstar, skriv han.
Les også:
