Her slår sykkeltjuvane til
Det er frå busstopp, kollektivknutepunkt og jernbanestasjonar dei fleste syklar blir stolne. Her er ti tips for korleis du unngår tjuveri.
I fjor var erstatningane etter forsikringsmelde sykkeltjuveri på rekordhøge 155 millionar kroner. Det viser tal frå bransjeorganisasjonen Finans Norge, skriv forsikringsselskapet IF i ei pressemelding. I 2022 vart det meldt 14 853 stolne syklar og elsyklar til forsikringsselskapa. I tillegg er truleg mørketala store, fordi mange stolne syklar verken blir melde til politiet eller forsikringsselskapa.
Kommunikasjonssjef i If, Sigmund Clementz, seier at mange kriminelle også klarar å kome seg inn på dei såkalla sykellhotella som finst ved fleire buss- og jernbanestasjonar, der området er ustyrt med lås, apptilgang og kameraovervaking. Tjuvane kjem seg inn ved å snakke med folk som har lovleg ærend på stadene, men også ved å smette inn døra etter ein annan før den går i lås. Ofte brukar tjuvane hettegenser eller kaps for ikkje å bli attkjende på overvakingsbileta.
Artikkelen held fram under annonsen.
– Det er også overraskande mange dyre syklar og elsyklar som blir stolne heimanfrå. Anten rett utanfor bustaden eller frå bu eller garasje. Derfor er det viktig å tenkje på god sikring heime òg. Hugs å låse sykkelen og bua. Lag det vanskelegast mogleg for tjuven. Vaiervåser har praktisk talt inga motstandskraft mot verktøya sykkeltjuvar bruker. Ein bøylelås, nesten same kor billig han er, vil skape meir trøbbel og stele tida til ein tjuv, seier kommunikasjonssjefen i If.
Ti tips mot sykkeltjuveri
• Vel ein solid lås det vil ta lang tid å bryte opp. Pris og kvalitet heng som regel saman.
• Lås sykkelen med to ulike låssystem, for då treng sykkeltjuven ulike verktøy.
• Fest sykkelen i noko solid og fastmontert.
• Sett helst frå deg sykkelen der det er mykje folk heile tida, då er den meir ubehageleg å stele.
• Parker sykkelen der det er opplyst.
• Ta vare på kvitteringa, skriv opp rammenummeret på sykkelen og oppbevar det på ein trygg stad. Ta bilete av rammenummeret.
• Hugs å ta av ekstrautstyr som sykkelcomputer før du forlèt sykkelen. Ta med batteriet til elsykkelen når du parkerer.
• Tek du av setet på sykkelen, gjer du den mindre attraktiv. Nokon demonterer også framhjulet når dei set frå seg sykkelen.
• Eit tips for dei vågale og dedikerte: Gjer sykkelen litt stygg ved å måle eller lakke på han.
• Når sykkelen ikkje er i bruk, bør han stå i ein låst garasje eller bu.
Kjelde: Forsikringsselskapet If
(©NPK)
