Her legg ekstraferja til kai

Kring femten bilar, medrekna HF-bilen, var med då den lokalhistoriske ferjeavgangen gjekk frå Tørvikbygd presis klokka 10.20 på sjølvaste 1. mai. Behovet vil truleg verta betre dokumentert når turistane for alvor byrjar strøyma til Hardanger. Sambandet skal ha to ferjer ut august månad.

Dei som var med den fyrste ferja, fekk endåtil tilbod om servering på ferjekaien, fyrst i Tørvikbygd og så i Jondal. Sp stilte nemleg opp – med flagg, partiparasoll, skiver med brunost, kaffi og Twist – for å markera den store dagen og det partiet reknar litt som «si» sak, sjølv om mange parti stilte seg bak ekstraferja. Til gode tilbakemeldingar serverte politikarane bilistane gjennom bilvindaugo.

– Ingen meinte dette var sløsing med skattepengane. Me møtte berre blide, hyggjelege folk, seier Sigrid Brattabø Handegard (Sp).

Fyrst i køen

Fremst i ferjekøen stod Therese Jarlind frå Øygarden, som var ute og lufta hunden Simba før avreise. Ho og familien var på veg frå Øygarden til skytestemne i Jondal, og slapp ein halvtime med venting på ferja. Ho fortel at familien faktisk hadde fått med seg at det skulle koma to ferjer på sambandet.

Vel om bord kunne senterpartistane frå Kvam og Jondal konstatera at tilhøva er betre enn på MF «Samlafjord» for dei som likar å nyta utsikta. På MF «Gulen» ligg nemleg opphaldsarealet oppe, og det er omgjeve av glasvegger. Dessutan kan ein gå rundt veggene på utsida. Servering var det derimot verre med, trass lovnadene på plakatar om alltid open kiosk.

På brua møtte gjengen Eldar Eikrem, som var øvstkommanderande på den fyrste avgangen og skal vera der i nokre dagar. Så kjem ein sogning som skal føra ferja resten av sommaren, fortel han.

– Det er ikkje berre enkelt å få mannskap på plass. Korleis har de løyst det? spurde Handegard.

– Eg er sunnmøring, svara Eikrem, som opplyser at mannskapet går 14 dagar på og 14 dagar av.

– Betre tryggleik

– Kva betyr ferja for Jondal?

– Betre trafikktryggleik og -avvikling er det viktigaste poenget. Folk står i kø, og det er problem med å lossa ferja, seier Handegard.

Partifelle Lajla-Margrethe Lindskog-Lund seier køen står langt, av og til i båe retningar, når trafikken er stor. Og endå verre er situasjonen truleg i Tørvikbygd, meiner ho.

– Dette er på høg tid, seier ordførarkandidaten.

Handegard trur trafikken vil auka ytterlegare med hyppigare avgangar. Ho er spent på utviklinga gjennom sommaren. Dei to Sp-damene rekna med at ekstraferja kunne verta nyttig allereie på dag éin, ettersom det var langhelg og skytestemne i Jondal.

Sp-duoen var positivt overraska over ferja, og ikkje minst over det nemnde utsynet. Kiosken lever dei greitt utan. Han vert inga Sp-kampsak med det fyrste.

– Me får gle oss over at ferja går. Skulle kiosken opna i sommar, er det berre fint, seier Handegard.

Lang historie

Trongen for ei ekstra sommarferje har vore eit politisk tema i fleire år, men ballen byrja verkeleg rulla i fjor. Då sytte mellom anna eit skred på riksveg 13 for stor trafikk på sambandet mellom Jondal og Tørvikbygd. Også i utfartshelgar har trafikken, som har auka jamt og trutt dei siste åra, vore omfattande.

Så stor var trafikken i fjor at køyretøy på båe sider av fjorden hopa seg opp i slikt omfang mellom avgangane at dei tidvis vart ståande i fylkesvegen. Særleg i Tørvikbygd skapa det kaotiske tilstandar då køyretøy som ikkje skulle med ferja, skulle freista passera køen. Lokale protestar fekk ordførarane på båe sider av fjorden til å krevja tiltak.

I budsjetthandsaminga i vinter la fleirtalet ti millionar på bordet for å finansiera ei ekstra ferje i sommarmånadene. Nokre månader seinare viste det seg at prisen vart om lag den doble, men dei folkevalde endra ikkje kurs. Fjord1 AS fekk oppdraget og hanka inn MF «Gulen», som skal overnatta ved verftet Fjellstrand på Omastrand.

– Det er oppsiktsvekkjande at prisen vart den doble. Eg veit det vert arbeidd med å vurdera om ein innanfor anbodet kan lysa ut jobben, seier Handegard.