Her hoppar ubåtmannskapet i fjorden
Ubåten KNM «Uthaug» var sundag kommen opp frå djupet utfor Gjerdaneset på Oma.
Berge Skåtun frå Vinnes i Fusa var på sundagstur med mora Elfrid, som er oppvaksen i Vikjo, for å helsa på slekta. Frå hytta til onkelen og tanta til Skåtun hadde han utsikt rett til ubåten.
Artikkelen held fram under annonsen.
– Etter ei stund vart det livleg på ubåten. Mannskapet kosa seg i sola, bada og hoppa frå tårnet, skriv Skåtun til HF.
Ifølge onkel Peder (90) til Skåtun er det første gong ein har sett ein ubåt så tett på land på Oma sidan krigen.
Skåtun har alltid fotoapparatet innan rekkevidd, og knipsa nokre bilete.
Bileta har fått stor merksemd. Då han kom heim, la han bileta ut på Facebook. På oppmoding frå ein Facebook-ven sende han dei til marinesjef Rune Andersen. Snart hamna bileta på sida til Forsvarsdepartementet, og sidan fekk Skåtun e-post frå det internasjonale mediebyrået AFP, som ville kjøpa to bilete.
– Ein kan seia mykje om Facebook, men me kjem lenger ut i verda, i alle fall! skriv Skåtun.
