– Her blømer det heile året
Næringsutvikling må finna stad i heile landet, meiner Ingrid Riddervold Lorange i Selskapet for industrivekst. Ho lèt seg imponera av det ho fekk sjå i Hardanger.
– Eg trudde eg måtte komma til Hardanger i blømingstida, men her kan ein sjå at det blømer heile året, sa Ingrid Riddervold Lorange, administrerande direktør i Selskapet for industrivekst (Siva) då ho opna dei nye lokala til Næringshagen i Hardanger (NH) fredag.
I løpet av besøket hadde ho sett fossar, smakt på sider og blitt presentert for ei rekke lokale bedrifter. Og til slutt fekk ho altså æra av å klippa det raude bandet.
Då Felleskjøpet-butikken flytta ut, overtok NIH etasjen, so no husar 11 flunkande nye kontor, to møterom og eit myldreareal med tre avlukke. Nokre av kontora er leigde ut til lokale verksemder.
Større kake
NH vart stifta i 2015 og året etter teke opp i Siva sitt program. NIH har mest aktivitet i Kvam og Eidfjord, og samarbeider med næringshagane i Ullensvang og på Voss.
– Eg brenn for næringsutvikling og skaparkraft. Det opplever eg hjå dykk. Målbedrifter er med på å bygga dette landet, alle stader. Det er viktig for heile Noreg. Det er meiningsfullt å jobba med dykk, sa Lorange.
Ho la vekt på kor viktig regionalt samarbeid er.
– Når fleire får til noko, kranglar ein ikkje om kakestykka, men jobbar saman for å gjera kaka størst mogleg. Samarbeid er noko av det me trur aller mest på, og det har stor tyding for heile regionen, sa ho.
Også Tor André Ljosland (KrF), leiar av hovudutval for næring i Vestland fylkeskommune, la vekt på lokalt samarbeid og regional verdiskaping. Han drog fram Mathuset i Hardanger AS som eit godt eksempel.
– Fell éin region etter, haltar fylkeskommunen. Lukkast éin region, vert fylkeskommunen drege med, sa han.
– Perfekt
Sigmund Vereide, dagleg leiar i NH, er både nøgd med og imponert over dei nye lokala som no er tekne i bruk. Særleg gjer det godt med romslege lokale i koronatida, seier han.
– Me har fleire bedrifter med oss, og nokre nye har komme inn. Det er veldig spanande, seier han.
Styreleiar Geirmund Stuve meiner lokala er perfekte for ein næringshage. Gründerar som ønsker å ta del i miljøet, kan låna eit avlukke.
Stuve spør seg om folk ser tydinga av å ha ein lokal næringshage.
– Me har utvikla oss i det stille i desse åra. No har me fire årsverk og fem kompetansearbeidsplassar, og me har sørgt for tilflytting til kommunen, seier han.
