Hardangerbadet hadde eit underskot på 1 million kroner etter dei fire første månadane i 2021.

Hentar inn garantiar

Hardangerbadet AS har henta inn 1 million kroner i underskotsgarantiar.

Eirik Dyrøy Lotsberg
Journalist
Publisert

Det kjem fram av ei kontoutskrift dagleg leiar Martin Vik har sendt til styret i Kvam Kvammabadet KF.

Alle garantistane har dessutan signert ei erklæring på at dei seier frå seg moglege regresskrav. Det vil seia at dei ikkje kan krevja å få pengane tilbake frå Hardangerbadet (HB). Dette var eit vilkår då heradsstyret vedtok å løyva 1,5 millionar kroner ekstra for å hjelpa selskapet.

— Fint med utbetaling frå Kvam herad i neste veke, skriv Vik i ein e-post til Kvammabadet.

Underskotsgarantistar

36 verksemder og einskildpersonar har stilt underskotsgarantiar til Kvammabadet.

Dei har lova å dekka ein viss prosent kvar av inntil éin million kroner i året dersom Hardangerbadet ikkje har råd til å gjera opp det ein skuldar det kommunale føretaket. Ordninga gjeld i 10 år.

Nokre av garantistane er Rolv Haugarvoll AS (20 prosent), Øystese Mek Verkstad AS (4 prosent), Kleppe Eiendomsselskap AS (3 prosent), Norheimsund Fargehandel AS (2,5 prosent) og Hallgeir Torpe Drosjeforretning (1,2 prosent).

Men ikkje alle vilkåra er oppfylte. Heradsstyret kravde dessutan at:

• Hardangerbadet må legga fram perioderekneskap og besøkstal annankvar månad i 2021.

• Hardangerbadet må snarast legga fram ein plan for likviditet og balansert drift seinast i 2022.

• Hardangerbadet Eigedom AS (HBE) må dekka minst 1 million kroner av underskotet til HB i 2020, anten ved å ettergi gjeld eller å auka eigenkapitalen.

Desse vilkåra må vera oppfylte før Kvam herad deler ut tilskotet.

Millionunderskot så langt

HB sende 27. mai eit rekneskap med inntekter og kostnader i dei fire første månadane.

Rekneskapen syner eit underskot på 1.084.541 kroner så langt. Driftsinntektene — utanom kafé, butikk, treningssenter og fysioterapi — er på 3.010.509 kroner. Driftskostnadene er på 4.093.961 kroner.

Bjarte Rasmussen, dagleg leiar i Kvammabadet, skriv at det vert rapportert for mai og juni i juli.

Etterlyser resten

Ordførar Torgeir Næss (Ap) skriv i ein e-post til Rasmussen at det er svært gledeleg at dei viktigaste vilkåra er på plass, nemleg betaling og erklæringar frå underskotsgarantistane.

Næss minner om at dei andre vilkåra står att. Han etterlyser eit perioderekneskap med grunnlagsdata i form av postar og summar. Dessutan krev han ei oversikt over selde einskildbillettar og oversikt over tal årskort.

— Dette er stort sett objektive data som skal vera lette å produsera og senda oss, slik at me får gjort utbetaling før sommaren, skriv Næss.

økonomi politikk nyhende hardangerbadet
Laga med Labrador CMS