Helsesenter permitterte ingen

Selskapet viser i søknaden til at pandemien førte til utsetjing av aktivitetane. Etter kvart kom ein i gang med avgrensa aktivitet i haust av di ein ikkje kunne ha meir enn to grupper til behandling samstundes, og gruppene vart reduserte til åtte. Ein måtte leiga lokale av Hardangerfjord Hotel for å ha stor nok plass til å halda avstand mellom helsegjestene. Føretaket har halde drifta i gang med pengar frå mellom andre Trond Mohn.

HH har ikkje permittert tilsette. Årsaka er at personalet ville ha forsvunne til andre stillingar og drifta vorte avvikla, ifylgje søknaden.

HH opplyser at hotellet vert tilført om lag 45.000 kroner i inntekter på ei veke frå ei gruppe med åtte pasientar og to behandlarar. På eitt år vert det kring tre millionar kroner. I tillegg vil pasientane nytta Hardangerbadet og butikkar.

— Når HH er i full drift, vil verksemda vera ei hjørnesteinsbedrift i Hardanger. Verksemda vil kunna gje eit tilbod til 1.300 pasientar med ei inntektsramme på nærare 30 millionar kroner, skriv dagleg leiar Janiche Buanes Heltne i søknaden.

Ho meiner hotellet vil verta tilført 7,8 millionar kroner og Hardangerbadet 390.000 kroner i året som fylgje av drifta.

Ifylgje rekneskapen fekk HH eit tilskot på 2,5 millionar kroner frå Innovasjon Noreg i fjor, 5,3 millionar kroner frå andre og knapt 2,1 milionar i anna salsinntekt. Lønskostnadene var 5,3 millionar kroner. Husleiga til Hardangerbadet Eigedom AS var knapt 0,9 millionar kroner.

Kvam herad har fått tildelt 1.581.575 kroner av potten som staten har sett av til kompensasjon for tap som fylgje av pandemien. Heradsstyret skal fordela pengane.