Helse i Hardanger stengjer døra
Trass verksam og rimeleg behandling av pasientar tapa Helse i Hardanger AS (HH) kampen om pasientane. No stengjer helseinstitusjonen døra.
Sidan avslaget frå Helse Vest i november er alle steinar snudde, skriv verksemda på heimesida.
– Det er for tidleg å seia kva lærdom me skal trekkja av denne historia, men ein ting er sikkert: Pasientane er taparane, står det.
Det same seier dagleg leiar Sissel Aase Børve. HH har både gjennomført, dokumentert og presentert det som i hennar auge er ei god løysing for pasientane og framtida. HH har vist at det verkar, men dette er prosessar utanfor kontrollen til selskapet, seier ho.
– Uforståeleg er vel det mest dekkjande ordet.
Tapa trass vellæte
Nedlegginga skjer vel fire år etter at HH starta prosjektdrift i samarbeid med Haukeland universitetssjukehus. Styret vedtok nedlegginga i eit styremøte onsdag i førre veke, og dei tilsette fekk beskjeden i eit møte torsdag.
Dagens system er ikkje berekraftig, meiner helseinstitusjonen. Målet har heile vegen vore å skapa eit kostnadseffektivt tilbod som kan gje helsevinst som varar.
– Me har klart oppgåva med glans! skriv verksemda.
I det legg HH at den konsentrerte behandlinga kostar mindre enn dei ordinære tilboda, og har gjeve pasientar auka funksjonsnivå og arbeidsevne, og redusert bruk av helsetenester. Pasientane har òg vore svært nøgde, skriv institusjonen. Resultata er publiserte i internasjonale tidsskrift, og fleire institusjonar i Norge og i utlandet og vist interesse for modellen.
Helse Vest har likevel konkludert med at tilbodet til HH ikkje er attraktivt nok, og ynskjer ikkje å kjøpa helsetenester av HH.
Pasientar vert fylgde opp
– No er det kroken på døra. Me har vendt på dei steinane som er. Me ser ingen andre moglegheiter, seier Børve.
Men sjølv om døra vert stengd, skal ikkje HH som organisasjon leggjast ned. HH er og skal framleis vera ei merkevare, eit kvalitetsstempel og ein arena for fagleg utvikling, skriv verksemda. Det er den aktive drifta som vert lagd ned, opplyser ho.
Dei tilsette vert permitterte og lokala sagde opp. HH som organisasjon vert oppretthalden for å ha moglegheit til å ta opp att drifta om det skulle opna seg nye moglegheiter.
Alle pasientar som har fått behandling, og som er i oppfylgingsfasen, skal fylgjast opp som avtala, opplyser Børve.
Les også:
