Helse Fonna i gul beredskap – barn innlagt på intensiven

Ein person under 18 år er lagd inn på intensiven på Haugesund sjukehus med koronasmitte. Helse Fonna går no over i gul beredskap.

I tillegg til personen under 18 år, får to pasientar mellom 18 og 64 år intensivbehandling. Totalt er no fem pasientar innlagde med koronasmitte, opplyser Helse Fonna i ei pressemelding onsdag ettermiddag.

Beredskapsleiinga i Helse Fonna har samtidig vedteke å endre beredskapsnivået frå grønt til gult og innføre besøksavgrensing.

Tiltaket gjeld inntil vidare og blir innført som følgje av den alvorlege smittesituasjonen i Nord-Rogaland og Sunnhordland. Helseføretaket har registrert eit aukande tal koronapasientar og ventar at dette aukar i tida framover.

I tillegg er 99 tilsette i karantene og anna koronarelatert fråvær.

Helse Fonna har allereie innført reduksjon i talet på planlagde operasjonar.

På grunn av smitteutbrotet i regionen innførte regjeringa tysdag strengaste tiltaksnivå i sju kommunar på Haugalandet fram til søndag 11. april.

(©NPK)