– Heller matvertar enn eige kjøken
Rådmannen ynskjer å skrota planane om eit lokalt produksjonskjøken og heller tilsetja fleire matvertar.
Dette er truleg ein betre bruk av ressursar for både brukarar og tilsette i helse og omsorg, skriv ho i saksutgreiinga. Inntil fem millionar kroner netto vil det kosta å ha matvertar i sving i heile heradet.
Det var før sommaren i fjor at Kvam heradsstyre la draumen om eit lokalt produksjonskjøken på is. Rådmannen rådde politikarane til å tenkja på meir enn berre middagar og i staden sjå heilskapen i mattilbodet. I august 2023 vart det vedteke heller å tilsetja og testa matvertar på Øysteseheimen og Strandebarm omsorg i eit år.
Positive tilbakemeldingar
17 personar vart tilsette i januar. Hovudoppgåva deira har vore å syta for at bebuarane får hyggjelege, smakfulle og næringsrike måltid, tilpassa kvar enkelt. Dette skulle frigjera tid for pleiepersonell.
Ifylgje ein rapport om prosjektet har resultata vore positive frå byrjinga. Både tilsette og brukarar melder om meir ro og glede kring måltida, mindre matsvinn og betre tilpassa ernæring for pasientane.
«Vekta til pasientane har stabilisert seg», «pasientane får frukt kvar dag», «tidlegare frukost til dei som er vakne og klare», «pasientane har auka matlyst» og «meir tid til pasientane mellom måltid» er mellom tilbakemeldingane. Andre tilsette opplever redusert stress knytt til måltidshandtering, og meir fokus på andre viktige oppgåver.
Matvertane har gjeve tilbakemelding om at dei trivst i jobbane, og at dei vil tilrå stillingane til vener. For fleire av matvertane har prosjektet vore den fyrste arbeidserfaringa deira. Nokre har valt å gå vidare med utdanning eller arbeid innan helse og omsorg, skriv rådmannen.
– Betydeleg dyrare
Vona var at ein ved å tilsetja matvertane ville redusera sjukefråværet og vikarbruken. Prosjektet har hatt positiv innverknad, men ikkje nok til å dekkja alle kostnadene, skriv rådmannen. Likevel vil matvertar på alle institusjonar med langtidsplass og heildøgers omsorgsbustader vera eit rimeleg alternativ, meiner ho.
– Lokal middagsproduksjon er betydeleg dyrare enn det noverande middagstilbodet, som vel å merka har vist seg gjennom ulike former for brukarundersøkingar å vera bra, står det i vurderinga.
Om fleire matvertar er noko Kvam herad skal bruka pengar på, skal diskuterast i formannskapet 7. november. Heradsstyret avgjer saka 14. november.
