Helland vann i retten

Hordaland tingrett har avvist kravet frå Industri- og Næringspartiet om å ta arrest i bankkontoane til Vestland INP. Duoen får dessutan halda fram med å nytt partinamnet og kalla seg høvesvis nestleiar og leiar i fylkeslaget.

Retten konkluderer med at sentralstyret har makt korkje til å løysa opp fylkesstyret eller til å ekskludera dei to politikarane.

– Konflikten i INP må løysast politisk, ikkje gjennom å kasta ut medlemer som er usamde med leiinga, seier advokatfullmektig Mathias Helseth i ei pressemelding frå Elden Advokatfirma.

Han prosederte saka saman med advokat John Christian Elden.

– Me er nøgde og ser fram til å halda fram arbeidet for INP og medlemene, seier Hellevang i pressemeldinga.

Det var 19. september sentralstyret i INP vedtok å setja fylkesstyret i Vestland under administrasjon ved å løysa opp det og stengja ute Helland og Hellevang. Dei to meiner at vedtaket var ugyldig. INP oppretta eit interimstyre i fylkeslaget.

I november bad INP om at det vart teke arrest i bankkontoane og teke ei mellombels avgjerd om å nekta dei to å representera partiet andsynes ålmenta. 11. desember møttest partane i retten.

I rettsavgjerda vert det mellom anna slege fast at vedtektene gjev berre fylkesstyra rett til å ekskludera medlemer. Vidare heiter det at sentralstyret ikkje kan løysa opp fylkesstyret, som er eit sjølvstendig rettssubjekt, men berre fylkeslaget.

INP må dekkja sakskostnader på vel 120.000 kroner for fylkeslaget, Helland og Hellevang.

INP-advokat Roy Andre Håkonsen Arteid skriv til BA at tingretten har akseptert at det skal eksistera ei form for anarki i politiske parti. Han understrekar at slutninga i retten ikkje inneber at det er «bindande avgjort» om eksklusjonane og oppløysinga er gyldige.