– Helikopter og orrfugl er ein dårleg kombinasjon
Den nye linetraseen i ålvikfjella kjem i eit område som kan vera aktuelt som framtidig nasjonalpark.
Det påpeikar Statsforvaltaren i Vestland i ei høyringsfråsegn til søknaden frå Statnett SF om konsesjon for flytting av kraftlina mot nord vest for Bjølsegrøvatnet.
– Arbeidet med omlegging av leidningen må utførast så skånsamt som mogleg, og mellombelse inngrepsareal må førast tilbake etter at lina er montert, skriv Statsforvaltaren.
Det bør undersøkjast om det finst spelplassar for orrfugl som kan verta påverka av helikoptertrafikk under anleggsarbeidet, meiner statens mann. Nye naturinngrep må avgrensast til det som er nødvendig. Ein bør unngå helikopterflyging og annan støyande aktivitet i spel- og hekketida, det vil seia i april–juli, meiner Statsforvaltaren.
Det er viktige friluftsverdiar i området, som er godt tilgjengeleg for fjellturar, og lina vil påverka landskapsopplevinga. Samtidig vil det vera positivt for friluftsinteressene at den eksisterande lina vert fjerna, skriv Statsforvaltaren.
Han meiner at den nye traseen ikkje har vesentleg ulik verdi samanlikna med dagens trasé, og at natur og miljø ikkje vil verta vesentleg påverka.
Denne veka vedtok fylkesutvalet i Vestland å støtta konsesjonssøknaden.
– Vestland fylkeskommune meiner det er bra at Statnett flyttar kraftlina på det strekket der risikoen er høgast for at vêr og klima gjer at ho dett ut. Bergensområdet er avhengige av at denne kraftlina er oppe og går for at kraftsystemet i regionen skal fungera godt, seier fylkesordførar Jon Askeland (Sp) i ei pressemelding.
Kvam herad har bede om å få høyringsfristen utsett, slik at politikarane rekk å handsama saka. Noregs vassdrags- og energidirektorat avgjer henne.
