Held kviss for ungdommane

Kvam ungdomsråd vil samla ungdommen i Kvam til digital spørjeleik i helga.

Laurdag ettermiddag arrangerer Kvam ungdomsråd ein «Kahoot», ein nettbasert kviss, for ungdommen i Kvam.

– Mange ungdommar keiar seg om dagane. Me tenkte å laga til noko som folk kan sjå fram til, eit høgdepunkt, der ein kan møta andre folk digitalt, seier Håvard Botnen, leiar i Kvam ungdomsråd.

Ungdomsrådet la førre helg ut ei spørjeundersøking i sosiale medium. Ungdommane vart spurde om korleis dei har det og kva dei kunne tenka seg å finna på. Eitt av svara som gjekk igjen, var at det hadde vore kjekt med ein Kahoot.

Vinnaren får ein veldig god premie, lovar Botnen.

Om det vert ein suksess, vil ungdomsrådet vurdera å halda fram, til dømes kvar helg.

– Viktig å komma seg ut

Botnen trur det kan verta lange dagar for ungdommane, med skule på dagen og Netflix eller dataspel på kvelden.

– Det tok litt tid for meg før eg innsåg at det er slik kvardagen kjem til å verta framover. Eg reknar med at mange synest det er keisamt og saknar noko å gjera på. Det er viktig å komma seg ut, gjerne gå ein tur kvar dag, seier han.

Han seier det gjeld å gjera det beste ut av situasjonen. Samlast på nett, ha videosamtalar og spela dataspel med vener.

– Me må halda saman og komma oss gjennom dette i lag. Sjølv om det er vanskeleg, må alle ta innover seg retningslinene og ikkje samlast i store grupper, seier Botnen.

– Snakk med ein du stolar på

Ungdomsrådet brukar Instagram-kontoen sin for å halda kontakt med ungdommane, mellom anna ved at medlemene legg ut glimt frå kvardagane sine.

Om nokon slit med vonde tankar eller har det vanskeleg heime eller med seg sjølv, oppmodar ungdomsrådet dei om å snakka med nokon dei stolar på.

Sjølv om skulen er stengd, kan elevar ta kontakt med læraren. Kvam har dessutan ei aktiv skulehelseteneste, ein eigen helsestasjon for ungdom og ein utekontakt som stiller opp, påpeiker rådet.