Held fram som styreleiar
Henrik Nordtun Gjertsen i Strandebarm har fått ny tillit som styreleiar i Norges Bygdeungdomslag.
Gjertsen kjem frå Sandnes, men driv saman med foreldra ein fruktgard på Fosse i Strandebarm. I fjor stilte han til val som 12.-kandidat for Kvam Sp. Han studerer elles ved Veterinærhøgskolen på Ås.
På årsmøtet i Rakkestad i Østfold 15.–16. juli vart han attvald som styreleiar. Han kan dimed ta fatt på det tredje året i posisjonen, melder Norges Bygdeungdomslag i ei pressemelding.
Gjertsen er nøgd med at årsmøtet gav styret klare signal om framtida.
– Eg gler meg til å arbeida for å leggja til rette for meir aktivitet i bygdene, seier han.
Han meiner engasjementet kring opptrappingsplanen for jordbruket i april synte kor stor kraft organisasjonen hans kan ha. Presset førte til eit betre framlegg frå regjeringa, meiner han.
Bygdeungdomslaget har vel 7.000 lemer i kring 100 lokallag og 11 fylkeslag. Dei fleste lemene er mellom 16 og 30 år. Dei arbeider for levande bygder med sosiale møtestader som grunnlag for busetnad og næringsliv i heile landet.
