Held fram med plan og håpar på kortsiktige tiltak

Samstundes som forprosjektframlegget hennar vert samrøystes skrota, gjev dei folkevalde rådmannen eit spark bak i arbeidet med eit lite, kortsiktig tiltak som kan dempa trafikkaoset i Norheimsund noko.

Ideen kom frå Bjørgulv Hauger (Frp), som meiner at det allereie vedtekne, heva gangfeltet nær avkøyrsla til Hardanger fartøyvernsenter kan vera ein god start og eit effektivt tiltak. Feltet vil dempa fartsnivået og såleis fordela trafikken betre i sentrum, meiner han.

Ikkje så enkelt

Svein J. Stuve (Sp), som køyrer buss, er ikkje usamd, men påpeika at det største kaoset oppstår i krysset ved Straumbrua. Bilane – spesielt rekkja med bilar frå ferja – vert ofte ståande lenge og vente på å få koma ut frå sentrumsgata, slik at det hopar seg opp med kø.

Geir Madsen (SV) minte om at det er regulert ei rundkøyring ved Straumbrua som kan løysa trafikksituasjonen på kort sikt. Etter hans syn må mellombelse tiltak på plass.

Stuve meiner ei rundkøyring hadde vore gode greier, men ottast at krava til tiltaket er høge og kjelkane i vegen fleire.

– Dei skal vel ha dei så store at ho kjem langt ut Movatnet, men det må vera råd å få til i mindre format, sa han.

Hans kortsiktige framlegg er eit heva gangfelt ved Ungdomshallen og kanskje ein fartshump på Straumbrua. Dei tiltaka kan gjera trafikkflyten betre.

– Det er reversible, enkle tiltak som kunne løyst litt, ikkje alt, men dei hadde gjort pina litt mindre, sa Stuve.

Heradsstyret vedtok samrøystes eit framlegg frå Hauger om å gjera gangfeltet ved fartøyvernsenteret til eit strakstiltak. Bjarte Helland – for tida med uklar partitilknyting – ottast vel å merka at gangfeltet kan få motbør i byråkratiet, av di det er for få mjuke trafikantar i området.

– For defensivt

Sp gjekk i bresjen for å halda fram arbeidet med reguleringsplanen i staden for å byta han ut med eit forprosjekt. Sistnemnde var nemleg rådet frå rådmannen, som meiner eit forprosjekt kan vera både meir tenleg og billegare enn ein plan.

Ho har dessutan fått innspel frå fylkeskommunen om at regulering kan vera bortkasta, sidan tunnelen enno ikkje er nemnd med så mykje som eit komma i ei prioriteringsliste. Otten er difor at han kan gå ut på dato som grunnlag for oreigning. Grensa er ti år.

– Eg veit ikkje om me kan vera så defensive. Det er ein uhaldbar trafikksituasjon i Norheimsund no, sa Gjermund Stuve (Sp), som minte om at «armen» skal gå via Norheimsund og vil auka trafikken.

– Me har ei flott bygd som etter kvart vert kvelt, sa han.

Stuve meiner historia har synt at det er tenleg å ha eit «gryteklart» prosjekt, og at dei folkevalde ikkje bør finna seg i at det går ti–tjue år før noko skjer.

– På sin måte

Ap ville fyrst skrinleggja reguleringsplanen og satsa på eit forprosjekt, men ombestemte seg i møtet. Sistnemnde vil avklara kva som er realitetane ved tunnelinnslaga, og slik sett avklara arealsituasjonen for dei som vert råka av tunnelen, sa Even Øyri (Ap).

Han påpeika at det heller ikkje er sikkert at fylkeskommunen kjem til å godta planen til kvemmingane. Krava til planar er høge i dag, og fylkeskommunen vil ha det på sin måte, hevda han.

Johanne Neteland (Sp) repliserte at Sp ottast at eit forprosjekt kan koma til å seinka tunnelen, og at ein må ha tillit til at dei som utarbeider planar, gjer det på skikkeleg vis.

Arne Opsahl-Engen (H) meiner det viktigaste er «tunnel no!», og at tempoet er mykje viktigare enn kronene. Han fekk ikkje eit klart svar på om forprosjektet eller reguleringsplanen er den snøggaste vegen til målet.

– Eit forprosjekt vil gje eit like raskt svar på om dette vert prioritert. Så vil reguleringsplanen koma når prosjektet er prioritert, sa sakshandsamar Leiv Ingmar Kaale i eining for plan og byggjesak.

– Eg kjøper ikkje heilt at me ikkje vert ståande bak prosjekta som ventar på verta regulerte, svara Gjermund Stuve.

Ser ei mogelegheit

Odd Valland Bovim (MDG) meiner spørsmåla er korleis kvemmingane kan verta best mogeleg budde med tanke på å sikra seg tunnelen den dagen det er aktuelt, og kva dei ulike vegane dit kostar. Han påpeika at det førekjem at kommunar regulerer fylkeskommunale, viktige vegprosjekt for å vera klare.

Bovim konkluderte, etter å ha fått svar frå administrasjonen, med at eit forprosjekt truleg vil spara korkje mykje tid eller store pengar for Kvam herad, og at det avgjerande er om heradsstyret ynskjer konsekvensane av å regulera. Etter hans syn er ein viktig konsekvens i så måte at Kvam får mogelegheita til å få vegprosjektet gjennom.

Bjarte Helland trur tunnelen vil pressa seg fram, og meiner det er viktig å ha papira klare. Konkurrerande prosjekt, som tunnel mellom pollane, er enno ikkje planlagde, påpeika han.

– Eg forstår ikkje at me plutseleg skal vika vekk i saka. Bakgrunnen for vedtaket var at me ville koma i posisjon. Eg har litt vondt for at me plutseleg skal endra strategien, sa Geir Madsen.

Karina Hoff (H) var ugild i saka av di ho er grunneigar i området der tunnelen og tilkomevegane kan verta plasserte. Rådmannen meiner difor at Hoff allereie no kan reknast som part i saka.