Held føredrag om Ukraina
Journalist, føredragshaldar og forfattar Halvor Tjønn snakkar om historia til Ukraina og Russland i Kunsthuset Kabuso 12. september.
Det går fram av eit presseskriv frå arrangøren, Kvam Senioruniversitet.
Russland og Ukraina står i dag i ein bitter krig som har kravd tusenvis av sivile og militære liv.
Dei to landa har gjennom 1.000 år vore tett samanvovne. Gjennom mesteparten av mellomalderen var sentrum i den russiske staten Kyiv og ikkje Moskva.
Tjønn har følgt dei store konfliktane i meir enn 30 år, og var utanriksmedarbeidar for Stavanger Aftenblad og Aftenposten på slutten av sovjettida. I ein tiårsperiode arbeidde han med internasjonal migrasjon, islamsk ekstremisme og internasjonal terrorisme.
Etter 2014 har han vore uavhengig journalist, kommentator og forfattar. Han skriv regelmessig i Dag og Tid og Norges Forsvar. Kvar veke held Tjønn føredrag om aktuelle og historiske tema.
