Held fast ved massekrav

Ullensvang kommune og Statsforvaltaren i Vestland mekla 25. oktober om framlegget til reguleringsplan for smoltanlegget på Torsnes.

Bakteppet er eit revidert planframlegg som mellom anna inneber at eit kalkulert masseoverskot på 750.000 kubikkmeter ikkje skal fyllast i sjøen, slik planen opphavleg var. Det store spørsmålet er kvar massane skal plasserast. Tiltakshavar Hardanger Fishfarm AS har planar om å selja og skipa ut massane. Det synest kommunen er ei god løysing.

Statsforvaltaren, representert av mellom andre statsforvaltar Liv Signe Navarsete personleg, understreka at statlege føringar tilseier betre utgreiing og avklaring av masseforvaltinga.

– Det må gjerast greie for kvaliteten på overskotsmassane, om det er behov for prosessering av overskotsmassar, og det må også gjerast greie for kva føremål overskotsmassane er eigna til. Vidare må eventuelt behov for mellomlagring av massar, plassering, arealbehov og omfang gjerast greie for i planforslaget. Det må vurderast konkrete prosjekt for mottak av massar. Føresegnene må ha rekkjefylgjekrav som sikrar at massehandteringa er avklara i plan før ein kan setja i verk tiltak i planområdet, heiter det i referatet frå meklinga.

I tillegg meiner Statsforvaltaren at det ikkje er gjort god nok greie for inntak frå og avløp av vatn til sjø. Det er uvisst om resipienten kan tola eit så stort utslepp, og tiltakshavaren må gjera betre greie for bruk av vassressursar og fylgjene for miljøet.

Om planen vert endra i tråd med innspela, kan kommunen vedta han. Elles må Kommunal- og distriktsdepartementet avgjera saka.