– Hektisk på Kvamskogen
Med strålande påskesol vart det folksamt i fjellheimen. Norheimsund Røde Korps Hjelpekorps fekk det travelt.
– Påsken har vore bra, men litt hektisk. Me har hatt mange oppdrag, seier leiar Ingeborg Steine Jensen til HF 2. påskedag.
Bortsett frå dei to påskedagane måtte hjelpekorpset rykkja ut dagleg, i hovudsak i samband med ymse småskadar etter uhell. Vêret og føret var for det meste godt heile påskeveka, så mange var på tur. I alt vart det registrert 21 skadar, nokre fleire enn vanleg, i påsken.
Operativ leiar Alf Ekaas Sandven i Øystese Røde Korps Hjelpekorps melder om ei rolegare høgtid i Hamlagrø. To utrykkingar – til eit beinbrot og ein person som kjende seg dårleg – vart noterte. I tillegg var hjelpekorpset budd til å rykkja ut til bergingsaksjonen i Kvanndalen, der to menn var Skorfaste langfredag. Dei vart berga av redningshelikopteret.
Sandven opplyser at rekrutteringa i hjelpekorpset er ei utfordring. Som fylgje av få frivillige må enkelte få ta veldig mykje ansvar. Vel å merka stiller gamle medlemer velvillig opp om det må til.
– Om ikkje rekrutteringa kjem seg, vil me slita, seier den operative leiaren.
Sandven har von om at ei ny hytte kan verta eit lyft som kan bøta på problemet. Han minnest då han var yngre og det var rift om vaktene. Med ei ny hytte kan det verta mykje meir attraktivt å stilla opp og bu der, trur han.
Utfordringa er å få hytta finansiert. Sandven fortel at hjelpekorpset no vurderer ei ny plassering for å sleppa å kryssa Hamlagrøvatnet for å nå henne.
Også i Norheimsund-korpset har rekrutteringa vore ein hemsko, men Jensen fortel at det gjekk seg til etter kvart og at det jamt over var bra med folk på korpshytta i høgtida. Også her stiller folk opp sjølv om dei ikkje har vakt.
