Hekk skal skjerma kyrkjegard
Dugnadsfolka i «Livoglyst» i Øystese har planta ein barlindhekk langs vest- og sørsida av kyrkjegarden i bygda.
Det fortel leiar i Øystese Grendautval, Kristi Opsanger. Den nye hekken er om lag 65 meter lang og strekkjer seg frå porten ved bårehuset, ned mot sjøen, svingar mot aust og endar ved stien inn til kyrkjegarden.
På strekkja stod det tidlegare eit gjerde som hadde sett sine beste dagar. Det vart teke ned og fjerna av seks frivillige før plantinga tysdag 3. oktober. Ein i grendeutvalet tok seg fri frå arbeid for å henta planter og jord hjå Gimle Planteskule.
Det gjekk med 144 planter og 27 sekker kugjødselkompost. Kostnaden på 36.900 kroner vart dekt med kulturmidlar frå Kvam herad og stønad frå Øystese Sanitetslag og Øystese Kvinne- og Familielag.
Dei i «Livoglyst» som har til oppgåve å pynta og halda ved like sentrum i Øystese, stilte opp på plantedagen. To kyrkjegardsarbeidarar hjelpte til med gravemaskin og tok av torv.
Fekk innspel
Tiltaket starta med innspel om innsyn og uro frå badestranda. Grendeutvalet hadde fleire møte med kyrkjeverja og soknerådsleiaren. Det vart semje om skjerming mot badestranda, og utvalet fekk fullmakt til å setja opp hekken. Gartnar Harald Olav Aksnes rettleia, og grendeutvalet jobba med å få alle løyve. Kvam Energi Nett AS og Kvamnet AS kontrollerte gratis om det var konflikt med kablar.
– Det var mykje å ta stilling til, men veldig kjekt etterpå, for det er berre vellæte, seier Opsanger.
Den vintergrøne planten barlind kan skjerast kraftig ned om det trengst, og han vil skyta opp att. Høgda på hekken kan justerast etter som ein føler for. Ein ynskjer å behalda utsikta, men vil òg ha ei viss skjerming.
Langt samarbeid
Det er ikkje inngått nokon avtale om kven som skal stella hekken, men om kyrkja spør grendeutvalet om det, så vil ein finna ut av det, meiner Opsanger.
– Det er ikkje fyrste gongen grendeutvalet samarbeider med kyrkja. Me har hatt eit godt samarbeid i mange år, seier ho.
Ho nemner fontena, måling av benker inne, reparasjon av benker ute og kyrkjelåsen mellom ting som grendeutvalet har hjelpt kyrkja med. Kyrkjegarden i Øystese ligg så midt i bygda at han fungerer som ein park. Mange går der og synest han er fin, seier Opsanger.
Ho synest tiltaket var sosialt og veldig kjekt, og rosar alle som deltok.
– Det var mykje arbeid, men også veldig mykje positive folk, seier ho.
«Livoglyst» er eit samarbeidsprosjekt som går over tre år, mellom Vestland fylkeskommune, Øystese Næringslag og grendeutvalet.
