Heimvend kvemming på plass
«Alle» sa at ho burde verta lærar eller journalist. Ho gjekk for sistnemnde, men har ikkje jobba som det etter utdanninga. Før no.
I slutten av juli selde Charlotte Svendsen og mannen huset sitt på Madla utanfor Stavanger. 33-åringen er oppvaksen i Steinsdalen, og ho og mannen fekk tilbod om å overta barndomsheimen hennar på Steine. Det ville dei, og i vår søkte ho arbeid i lokalavisa.
Måndag 12. august hadde den heimflytta kvemmingen sin fyrste arbeidsdag hjå HF. Ettersom vår grafiske designar er ute i fødselspermisjon, og me har litt anna uventa fråvær for tida, trong HF ein vikar.
– Sidan Charlotte har vore vikar her for ein del år sidan, visste eg litt om kva ho kan tilby oss: effektivitet og ei uredd haldning. I tillegg har ho journalistutdanning i botnen, seier bladstyrar Sigbjørn Linga.
– Veldig glad
Etter nokre samtalar og avklaringar var det eit enkelt val å gje henne tilbodet, fortel han. Førebels gjeld vikariatet fram til sommaren.
– Eg er veldig glad for å få henne med på laget. Ettersom me skal byta leverandør av det meste dei neste fire månadane, noko som vil krevja ein del tid og energi i redaksjonen, er det godt å ha litt meir å gå på for å vera mindre sårbare og få ein meir leveleg arbeidskvardag, seier Linga.
Tilsetjinga av Charlotte inneber at HF har fire årsverk i redaksjonen med redaktøren og tre journalistar – når alle er på arbeid.
Merksame lesarar vil òg ha fått med seg at Sindre Helgheim stilte opp for HF i byrjinga av august. På grunn av fråvær var hjelpa hans kjærkomen, og det er sannsynleg at namnet hans vil dukka opp att også ved seinare høve, fortel redaktøren.
– Stor del av livet
For Charlotte og familien starta flytteprosessen smått allereie i haustferien i fjor. Då sette familien i gang med oppussing av barndomsheimen. Sidan har det vorte mange turar mellom oljebyen og heimbygda. I slutten av juli vart huset deira selt, og snuten kunne for alvor peika mot Kvam. Eller mulen, heiter det nok i denne familien.
Charlotte, mannen og dei to døtrene hadde nemleg ikkje berre klede og møblement med seg i flyttelasset. Også seks hestar har dei fått plass til.
Ein vart faktisk seld dagen før intervjuet, så no har ho «berre» ni, fortel ho. Tre er framleis på beite i Stavanger, og kjem til Steinsdalen etter kvart.
– Travsport ein stor del av livet for oss, seier den ferske journalisten.
Sjølv køyrer Charlotte travløp og rir monté. Jentene hennar køyrer ponniløp, og også mannen Stian, som ho møtte i hestemiljøet, har interesse for dei firbeinte.
Framleis uvisst
Men sjølv om hest var best allereie frå tidlege barneår, var det ikkje det Charlotte ynskte å jobba med.
– Eg har eigentleg aldri visst kva eg vil, og eg veit det framleis ikkje, seier ho.
Då tida var inne for å studera, fekk ho beskjed om at ho ville passa som lærar eller journalist. Studietida byrja med eit halvår på lærarstudiet.
– Det var ikkje noko for meg. Det var fordi eg ikkje kom inn på journalistikk i Bergen, fortel ho.
Året etter, like etter at ho hadde møtt kjærleiken i rogalendingen Stian, kom ho inn på journalistikk i Stavanger. Den fyrste sommaren hadde ho sommarjobb i HF. Sidan var ho ti veker i Jærbladet og ti veker i Stavanger Aftenblad i samband med utdanninga.
Ein menneskekjennar
Då journalistutdanninga var i boks, søkte Charlotte på det meste av arbeid. Skrekken var å gå arbeidsledig, fortel ho. Jobbsøkinga førte henne inn i ei stilling i Madla Handelslag. Der var ho både prosjektleiar for sosiale medium og seljar i ein blomebutikk.
I 2017 vart blomebutikken seld til Mester Grønn, og då Charlotte vart tilsett der. Fyrst som seljar, og seinare som nestleiar og assisterande butikkleiar.
– Kva erfaringar tek du med deg frå tida hjå Mester Grønn?
– Eg har vorte god til å kjenna folk og å takla folk med ulike meiningar og framgangsmåtar. Ein vert ein god menneskekjennar, seier Charlotte.
Elles er dalingen van både med tidsfristar og å gjennomføra intervju. Ved sidan av butikkjobben har ho nemleg arbeidd som livereporter for Maverix Media, som har sendingar på tv-kanalen Rikstoto Direkte i samband med travløp. Det vil ho halda fram med når tida strekkjer til.
Førebels har Charlotte funne seg godt til rette i journalistrolla, og kjenner på at det er litt som å koma heim att.
– Sigbjørn (bladstyrar, journ. merknad) er den same, og også Camilla (bladeigar, journ. merknad) var her då eg jobba her sist. Eg trur det vert bra. Eg trur eg vil trivast, seier Charlotte.
