— Heilt naudsynt å utbetre fylkesvegnettet

Det er 55.000 kilometer med fylkesvegar her i landet, og mange av vegane er i dårleg stand. Det er naudsynt at staten tek eit større ansvar, meiner Opplysningsrådet for vegtrafikk i ein ny rapport.

Direktør Øyvind Solberg Thorsen i Opplysningsrådet seier til Nynorsk pressekontor at staten no må ta ansvar for ei naudsynt oppgradering på dei viktigaste fylkesvegstrekningane. Og ein plan for dette bør varslast i den komande nasjonale transportplanen frå 2022 til 2028, legg han til.

Han opplyser at det er fylka Agder, Vestland, Troms og Finnmark som har det dårlegaste fylkesvegnettet. Ifølgje tal frå Statens vegvesen er det 80 prosent større sjanse for å misse livet på ein fylkesveg enn på ein europa- eller riksveg.

Skule og næring

— Vi må hugse på at fylkesvegane er både skuleveg, arbeidsveg og veg for næringstransport, og lokalt er dette vegane med størst trafikk. Det er 55.000 kilometer med fylkesvegar her i landet, men berre 10.000 kilometer med riksvegar, seier Solberg Thorsen.

Han er klar på at kvaliteten på det norske vegnettet er forbetra sidan den førre rapporten frå OVF for fem år sidan, men at det no er heilt naudsynt at staten må ta eit større ansvar for vedlikehaldet av fylkesvegane.

Øyvind Solberg Thorsen opplyser at OVF opererer med to kategoriar av fylkesvegar. Det er dei primære fylkesvegane, som er dei tidlegare riksvegane som vart endra til fylkesvegar i 2010.

Dei sekundære fylkesvegane er vegane som var fylkesvegar også før 2010, og det er i denne gruppa ein finn den dårlegaste standarden. Dei er som oftast smalare og meir svingete enn dei større fylkesvegane, men dei har likevel eit stort innslag av næringstransport.

Store variasjonar

— Fleire av fylkeskommunane har gjort ein god jobb med vegnettet sitt, andre igjen ikkje fullt så bra. Og det er store variasjonar, der Vestland, Agder og Troms og Finnmark gjer det dårlegast på indikatoren vår for køyreteknisk kvalitet, seier han.

OVF-direktøren nemner at indikatoren fortel at det har vore ei forbetring for alle vegtypar og alle typar veg i perioden 2014-2019, og det er særleg kvaliteten på vegdekket og vegbreidda som har betra seg.

Det er likevel klart at forbetringane for riks- og europavegane er mykje større enn for fylkesvegane, og at det igjen er med på å skape auka forskjellar i vegstandarden.

Det er Vista Analyse som har laga rapporten på oppdrag frå OFV.