— Heile kroppen skal få gjennomgå

Om lag to millionar kroner skal investerast i ymse trenings- og leikeapparat i området mellom kulturhuset og ballbingen. Den fyrste dosen med utstyr er allereie levert på parkeringsplassen like ved. Grunnarbeidet som må til, vert starta med det fyrste.

Margareta Sandvin Eiken i idrettslagsstyret påpeikar at Herand dei siste åra har mangla leikeplass for dei minste. Plassen i Tveitehagen rauk med då ungdomsbustadene vart reiste. Leikeapparata ved den for lengst nedlagde barnehagen har vore ein del i bruk, men ville ikkje ha vorte godkjende i dag, fortel Eiken.

I sistnemnde område kjem det fleire nye leikeapparat for dei minste, mellom anna nytt dissestativ, i tillegg til at to gamle vert rehabiliterte. På ein del av den gruslagde plassen ovanfor vert det eit kombinert trenings- og leikeområde med apparat til eigenvektstrening og eit stort klatrestativ. Som om ikkje det var nok, kjem det treningsapparat for vaksne på flaten på fjordsida av ballbingen. Underlaget vert heildekkjande gummi, eit dekke som skal leggjast på éin dag.

— Heile kroppen skal få gjennomgå, seier Eiken, som fortel at både leverandøren og fysioterapeut Maren Espedal Miille har gjeve råd og rettleiing undervegs i planlegginga.

Ny møteplass

— Dette skal verta eit anlegg som skal verta ein styrke for bygda med tanke på både fastbuande, idrettslaget og skigrupper og andre treningsgrupper, seier Kaia Gulbrandsen i styret i bygdelaget.

Vona er å skapa ein god møteplass i eit fint område som har stort potensial, men er for lite i bruk.

Konsekvensen av tiltaka er at ein del av parkeringsplassen ved kulturhuset ryk med. Bortsett frå parkering og 17. mai-arrangementet er plassen lite i bruk, og det finst bra med parkeringsplassar i nærområdet som kan nyttast, påpeikar Eiken.

Laga har vore medvitne at dei ikkje skal okkupera den bakarste delen av grusplassen, i fall det skulle verta aktuelt med utviding av bustadområdet Tveitehagen og ny tilkome frå kulturhuset.

— Har kontroll

Søkjarane har fått tilsegn om full spelepengepott til nærmiljøanlegget, det vil seia 600.000 kroner. I tillegg kjem gåver. Mellom anna støttar Sparebankstiftinga Hardanger prosjektet med 400.000 kroner. Søkjarane reknar med å stilla med ein halv million kroner i eigenkapital, pluss ein stor dugnadsinnsats.

Damene vedgår at investeringa er stor for to små lag, men dei forsikrar at økonomien er under kontroll. Ved å gå saman får dei både fleire strenger å spela på, fleire kanalar å nytta i finansieringa og fleire potensielle dugnadskandidatar.

Visjonen for prosjektet er å fremja bulyst, skapa eit attraktivt reisemål og medverka til god folkehelse.

Eiken reknar med at alt skal vera ferdig i løpet av oktober.