Heidrar god nynorsk i næringslivet

Kvam mållag opprettar ein årleg målpris som skal delast ut til bedrifter som brukar nynorsk godt, opplyser leiar Randi Jåstad.

– Me har lyst til å løfta fram og skryta av dei som har vilje og evne til å bruka god nynorsk, både internt i bedrifta og eksternt, i annonsar og utettervend kommunikasjon, seier ho.

Vil styrkja identiteten

Ho viser til tendensen i samfunnet til at bokmål dominerer og at engelsk vert brukt unødvendig.

– Me vil styrka den nynorske identiteten til næringslivet i distriktet. Det er mange bedrifter i Kvam som er flinke, og det er me glade for. Me vil at prisen skal vera ei oppmuntring for bedrifta som vert vald ut, og at ein ser at språkvala ein gjer, vert lagde merke til.

Mållaget vil at kvemmingar skal legga merke til språket bedriftene nyttar, og senda inn kandidatar med grunngjeving til styret, som skal vera jury. I slutten av november skal det stellast i stand ei markering der prisen vert delt ut. Storleiken på markeringa vil vera avhengig av koronasituasjonen. Premien er eit kunstverk av ein lokal kunstnar.

– Ikkje berre i poesi

Jåstad trur det har ein positiv effekt at folk møter nynorsk i kvardagen, når dei handlar og i møte med bedrifter elles.

– Ofte legg me ikkje merke til om noko står på nynorsk eller bokmål. Me meistrar båe målformene. Men eg trur det bevisst og ubevisst kan vera med på å styrka den nynorske identiteten til folk. Eg trur det har ein innverknad at bedrifter vel nynorsk. Ungdommen ser at det ikkje berre er fint i poesi, men at det er eit bruksspråk som me kan vera krye av, seier ho.

Jåstad viser til at mange forfattarar og andre i kulturlivet har nynorsk som ein naturleg del av sitt virke, men at det er mindre fokus på nynorsk, og språkbruk generelt, i næringslivet. Med prisen ønsker ein å bevisstgjera og skryta av dei som gjer ein god jobb.