Heidra Galtung i Jonatunet

Årets arrangement i Jonatunet i Jondal var det fyrste etter at Johan Galtung (1930–2024) døydde i februar.

– Galtung i seg sjølv var ein institusjon. Han hadde stor detaljkunnskap. Det var aldri tvil om kva verdiar han stod for. Når han uttala seg, gjorde han det alltid med fagleg tyngd, seier føredragshaldar John Yngvar Jones.

Fred og Galtung

Årets hovudtema var «vegar til fred». Hardangerakademiet sette søkjelyset på å løysa konfliktar og skapa fred med fredelege midlar. Fredfull konflikthandtering, diplomati og samarbeid om globale utfordringar var på agendaen. Organisasjonen tek avstand frå krig og våpen som løysingar på konfliktar, ifylgje programmet.

Arrangementet inneheldt føredrag, aktivitetar og måltid. Mange av deltakarane overnatta på Jonatunet. Ein av dei var Helge Jenssen.

– Eg har reist frå Bodø for å få med meg dette. Det er andre gong eg er her, fortel han.

Jenssen reknar seg sjølv som fredsaktivist og militærnektar. Han har vore ein av initiativtakarane til Fredsbevegelsen i Bodø, fortel han. Bodøværingen tykkjer det er interessant og kjekt å vera ein del av fellesskapen i Jonatunet. Her møter han mange som har dei same haldningane til å skapa fred, fortel han.

Godt ettermæle

Under årets symposium vart ettermælet til Galtung heidra på fleire måtar. Ei litteratursamling etter fredsforskaren var stilt ut. Eit Galtung-bibliotek er i kjømda. Ein vegg romma kjende sitat frå Galtung.

I programmet vart Galtung omtala som ein som viste konstruktive, kreative og konkrete vegar til å løysa konfliktar, og som bidrog til forsoning og fred. Fyrste føredrag på programmet var «Arven etter Galtung».

Susanne Urban har skrive boka «Galtungs metode for fred», og er rådsmedlem i Hardangerakademiet. Ho var òg blant føredragshaldarane. Føredraget hennar tok utgangspunkt i boka «Reconciliation: Clearing the past – building a future». Galtung var medforfattar.

Urban snakkar varmt om Galtung.

– Eg har aldri møtt ein som er så klartenkt. Han var konstruktiv, kreativ og flink til å tenkje utanfor boksen, seier ho.

Urban poengterer at samlingane er livsviktige for Hardangerakademiet. Vidare fortel Urban at ho likar godt å snakka med deltakarane i Jonatunet, då dei ser mot meir fredfulle løysingar enn militarisering. Urban sjølv har vore med sidan tusenårsskiftet, fortel ho. Som arkitekt bidreg ho aktivt til fornying av bygget.

Diskuterte verdskonfliktar

Då HF var innom laurdag føremiddag, hadde statsvitar Glenn Diesen digitalt føredrag om media si rolle i Ukraina-krigen. Diesen meiner blant anna at dekninga av krigen er for einspora, og at framlegg om andre innfallsvinklar vart oversette. Etter føredraget opna Diesen for spørsmål frå deltakarane.

Helge Jenssen sa at føredraget til Diesen var interessant. Jenssen påpeika at det er viktig at fleire synspunkt på bakgrunn for krigen kjem fram. Arbeidet til Diesen burde vore meir synleg for fleire, meiner han.

Meir i kalenderen

Hardangerakademiet har fleire planar. Måndag vert det minnestund for Johan Galtung.

I tillegg til leirskule vert det, som før valet i fjor, arrangert brubygging mellom menneske, kulturar og natur 19. august. Representantar for alle politiske parti i Ullensvang kommune deltek. Bak står Hardangerakademiet og Jondal Frivilligsentral.

I haust kjem professor Roger Strand ved Universitetet i Bergen på vitjing. Saman med Hardangerakademiet skipar dei arrangementet «Bære eller breste» i oktober.