Havforskingsinstituttet lanserer alge-nettstad

Stor algeoppblomstring i oppdrett i fjor sette heile næringa i full beredskap og førte til store tap. No lanserer Havforskingsinstituttet (HI) ei nettside med informasjon om skadelege algar.

Hensikta er å styrkje beredskapen og fagdirektør Geir Huse i HI meiner arbeidet vil gi betre overvaking av giftige algar.

– Vi vil også investere i fjernmikroskop slik at ekspertane våre kan sitje på kontoret og bruke mikroskop ute i felt, kor oppblomstringa av algar finn stad. Vi skal gjere det enkelt å sende inn informasjon, og raskt publisere relevante data på den nye nettsida, seier Huse i ei sak på nettsidene deira.

Prosjektleiar Lars-Johan Naustvoll meiner næringa vil vere ein viktig bidragsytar.

– Noko av det vi lærte av frå i fjor, var at det er viktig å dele informasjon mellom aktørane. Slik kan vi klare å skape eit betre bilde av oppblomstringa over eit større område, seier han.

På lang sikt er målet at nettstaden skal dekkje heile landet, og at data frå både det offentlege og næringsaktørar blir basisen for varslinga.

(©NPK)