Haukeland sjukehus set igjen inn vakter ved inngangane etter fleire smittetilfelle
Sju tilsette frå seks ulike avdelingar i Helse Bergen er smitta av koronaviruset. No gjeninnfører Haukeland universitetssjukehus streng besøkskontroll.
– Det som bekymrar oss, er at dei smitta kjem frå seks ulike avdelingar. Dei har ingen samanheng, og smittevegen er ulike. Og smitten kjem utanfrå, seier administrerande direktør Eivind Hansen til Bergens Tidende.
Det var fredag det vart kjend at tre tilsette ved Haukeland universitetssjukehus i Bergen har fått påvist koronasmitte. Søndag vart det kjent at ytterlegare fire hadde vorte smitta.
Artikkelen held fram under annonsen.
Smitten omfattar i tillegg 51 tilsette og pasientar. 42 tilsette er sette i karantene, og 9 pasientar er i isolasjon.
Som følgje av smittetilfella, gjeninnfører Helse Bergen no inngangskontroll ved Haukeland. Det betyr at det i løpet av veka vil bli sett inn vektarar ved alle publikumsinngangar. Dette var òg tilfelle i vår fram til juni.
– Vi må setje i verk tiltak for å hindre at vi får meir smitte inn på sjukehuset. Besøkjande må ikkje komme viss ikkje det er strengt nødvendig, seier Hansen.
Pårørande til alvorleg sjuke, får framleis komme.
(©NPK)
