– Haug held fram som ordførar

Ein valteknisk avtale mellom Ap, INP, KrF, SV og H sikrar framhald for Roald Aga Haug (Ap).

Det kunngjorde Haug sjølv i form av ein signert avtale på valsendinga til Hardanger Folkeblad litt før klokka 01.30 valnatta. Han kunne ikkje svara på kven som vert varaordførar. Partia som ynskjer det, kan inngå ein avtale om politisk samarbeid, ifylgje den kortfatta avtalen.

Ap låg litt før klokka 02.30 i natt an til å få 11 representantar, mot 12 til Sp. Dei to partia hadde nesten nøyaktig like mange røyster.

Lajla-Margrethe Lindskog-Lund (Sp) sa til oddabladet at ho ikkje var overraska over grepet til Ap, men også at eit samarbeid med Ap ville ha vore krevjande for hennar parti. Ho er skuffa over H og INP, sa ho.

Partia som samarbeider, vil ifylgje tala i natt i alt få 19 representantar. Eit par hundre røyster er ikkje talde.

I Jondal valkrins fekk Sp 38,7 prosent av dei opptalde røystene, medan Ap fekk 28,6 prosent. I Odda krins fekk Ap 46,5 prosent av røystene.