— Hareide lova ingenting
Statsråd Knut Arild Hareide (KrF) fekk høyra om rasfaren i Tokagjelet, men lova ikkje noko pengeras.
Det opplyser ordførar Torgeir Næss (Ap) i Kvam i ei oppsummering av møtet med samferdsleministeren torsdag. Kvemmingen vart invitert inn i møtet om Nasjonal transportplan (NTP) av fylkeskommunen, same dag som han og varaordførar Frode Nygård (Frp) gav Bergens Tidende ei innføring i Tokagjelet-saka.
I artikkelen gjev kvemmingane klart uttrykk for at dei ikkje ynskjer å betala høge bompengesatsar for å rassikra ein veg som fungerer som omkøyringsveg når europaveg 16 er stengd mellom Bergen og Voss.
— Me er svært glade for å ha ein samferdselsminister som anerkjenner og ser problematikken rundt finansieringa av omkøyringsvegen, og ikkje avfeiar det som eit fylkeskommunalt ansvar. Det er heilt avgjerande skal ein koma fram til ei løysing. Ministeren kjenner problemstillinga godt, og eg opplever han som lydhøyr og løysingsorientert, fortel Næss etter møtet.
Han oppfattar også fylkeskommunen som genuint interessert i å finna ei løysing i Tokagjelet. Ifølgje Næss framheva fylkesordføraren at fylkeskommunen allereie bidreg mykje til prosjektet i Tokagjelet, og at bompengar åleine ikkje kan fullfinansiera prosjektet.
Næss seier han bad om eigne omkøyringsvegkroner pluss ein generell auke i potten til rassikring i NTP. Han påpeika at fjellet er så dårleg i Tokagjelet at heile vegen kan rasa ut, slik geolog Harald Hauso opplyste til regionavisa.
— Konkrete lovnader no kom ikkje, noko me heller ikkje kunne rekna med. Eg opplevde møtet som så positivt frå Hareide si side som det kan vera før NTP vert lagd fram, samanfattar ordføraren.
Kommunedelplanen for Tokagjelet vart vedteken i fjor. Tunnelen skal få frå Kletten i Steinsdalen til Eikedalen.
