Hardingar samlar inn klede for å hjelpa: – Imponert over den store gjevarviljen

Eit av romma i den tidlegare ungdomsskulen i Norheimsund var allereie i ferd med å verta fylt av klede, leiker og sko få minutt etter at ein innsamlingsaksjon i regi av Nav Kvam og Grannehjelpa var i gang torsdag ettermiddag.

– Lett å skaffa frivillige

– Det er veldig mange som ynskjer å hjelpa til og å bidra, fortel dagleg leiar Gunn Hilde Øymo i Grannehjelpa.

Grannehjelpa fekk spørsmål frå flyktningtenesta i Nav Kvam om å vera med på å samla inn klede og utstyr til flyktningar som har kome og skal koma til Kvam, fortel Øymo. Kort tid etter at ho hadde delt arrangementet på nettet, hadde fleire frivillige gjeve henne beskjed om at dei ynskte å hjelpa til.

Saman med Elin Tonning, fagleiar for flyktningtenesta i Nav Kvam, og dei frivillige tok Øymo imot dei som kom innom lokalet. Innhaldet i sekkane og øskjene vart sortert etter kategoriar og storleikar.

– No får ein både rydda i klesskapet og gjort noko godt for andre, seier Norunn Repål Løyte.

Ho var ein av dei fem frivillige som var i full sving med utpakking då lokalavisa var innom. Løyte tykkjer det er flott at bygda gjer noko saman for å bidra. Ifylgje henne er det enkelt å stilla opp og ta del i det frivillige arbeidet i Kvam.

– Å gjera ein slik jobb er viktig og gjev ei god kjensle. Ikkje treng ein nokon bakgrunnskunnskap for å få det til heller, fortel Løyte.

Ifylgje Tonning skal alt som vert samla inn, vera tilgjengeleg for både flyktningar som kjem i år, men også for dei som kom i 2021.

– Det er viktig at det er likt for alle, understrekar ho.

Planen er at rommet skal vera tilgjengeleg for flyktningane i Kvam. Der kan dei etter behov plukka ut det dei treng av klede, sko og leiker til borna.

Stor gjevarvilje

Same dag var det innsamling i Jondal og Herand. Roald Haustveit, som stod bak innsamlinga, hadde fått lånt ein lastebil av Hardanger Fjordfrukt og var innom dei to bygdene for å ta imot alt frå klede og sko til ullteppe og bleier.

Haustveit er godt nøgd med resultatet.

– Eg er imponert over den store gjevarviljen hjå folket, seier han.

Lasset køyrde han til Karmøy måndag, der Stiftelsen Tro, Håp, Kjærlighet har hovudbase. Alt som er samla inn, vert vidare frakta til grensa til Ukraina, og er truleg framme til helga, ifylgje Haustveit.

Faste turar

Haustveit har i mange år arbeidd med hjelpesendingar til Ukraina, og som sjåfør for Tro, Håp, Kjærlighet har han hatt fleire turar dit. Det han har sett og opplevd i landet, er noko av det som motiverer han til å gjera meir, fortel han.

Innsamlinga torsdag var berre ei av mange, ifylgje Haustveit. Han fortel at han kontinuerleg har teke imot klede og anna frå ulike område langs fjorden. Når lassa er passeleg store, tek han seg ein tur til Karmøy.

– THK har eit velfungerande mottaksapparat. Eg veit at det som vert levert inn der, kjem fram, understrekar Haustveit.

Han snakkar varmt om det frivillige arbeidet i bygdene langs fjorden og innsatsen mange gjer.

– Eg har sagt at eg tek meg av transport dersom eg får hjelp til innsamling. Det får eg i stor stil, seier Haustveit.