Hardingane er samde om armen

14. desember stilte rådet seg samrøystes bak ei fråsegn om konseptvalutgreiinga (KVU). Alle dei fire ordførarane gav støtte til konsept 1 frå Jøsendal til Trengereid.

Rådet argumenterer med at konseptet gjev gode mogelegheiter for trinnvis utbygging, til dømes gjennom auka ferjefrekvens mellom Jondal og Tørvikbygd og skredsikring og utbetring av riksveg 13 gjennom Oddadalen.

Dagens veg kan i stor grad brukast, reisetida vert monaleg kortare, og ein får sjansen til å gjennomføra store skredsikringstiltak på fylkesveg 49, påpeikar rådet i fråsegna. Samla sett tek konseptet omsyn til fleksibilitet og oppnår flest mål for tryggleik og reisetid for både trafikk mellom aust og vest, regional trafikk og lokaltrafikk, ifylgje fråsegna.

Ordførar Torgeir Næss (Ap) i Kvam meiner fråsegna er god og konsis, og trur det vil vega tungt at Hardangerrådet gjer vedtaket.

– Dette er ei historisk mogelegheit for å betra dei trafikale forholda, spesielt mellom Norheimsund og Odda, men også i Tokagjelet, sa han.

Les også:

Prinsipiell debatt

Ordførar Timo Knoch (Ap) i Eidfjord viste til at ulike kommunar og regionar vil leggja vekt på ulike omsyn i slike saker. Han meiner at det kan vera grunn til å ha ein prinsipiell debatt i rådet om vegval i samferdslesaker. Etter hans syn bør rådet stå samla i slike saker, men kunna heia på ulike samferdsleprosjekt. Ein må vera raus og unna einannan gode, meiner han.

– Me må snakka om eigen politikk utan å snakka ned andre. Det bør me tenkja over korleis me gjer, sa Knoch.

Ordførar Roald Aga Haug (Ap) i Ullensvang minte om at saka gjeld eit konsept, ikkje sjølve bygginga av vegen. I ein stor region som Hardanger kan det vera ulike interesser på samferdslefeltet, og kommunane kan støtta kvar sine prosjekt. Han minte om at tilhengarane av Hardangerbrua og Jondalstunnelen støtta båe prosjekt, i alle fall offisielt. I ei anna sak, utgreiinga av hovudvegen mellom aust og vest, valde rådet ikkje å uttala seg på grunn av usemje.

– Du kan vera for at KVU skal konkludera med alternativ 1, men likevel vera mot at armen til Bergen skal realiserast, sa Haug.

Han påpeika at regionrådet har vore eit «konsensusråd» der praksisen har vore at ein har uttala seg når alle har kunna samla seg. Ulempa er at prioriteringane kan verta utydelege, påpeika han.

– Latt oss vera litt realistiske. Det er ikkje sikkert hardangerkommunane vert samde om absolutt alt. Ein må samarbeida om det som sameinar og som me kan vert samde om, sa han.

Les også:

– Austlendingane tek alt

Næss meiner rådet skal drøfta samferdsleprosjekt, og meiner det er ein stor styrke om rådet stiller seg bak. Ordførar Jens Olav Holven (Sp) i Ulvik trur vestlendingane tapar på det når dei ikkje vert samde om samferdsleprosjekt.

– Om nokon er for det og nokon for det, vert det splitting. Dimed tek austlendingane alt. At Hardangerrådet står samla og står bak kvarandre, trur eg er viktig, sa han.

Knoch viste til at eit anna regionråd skal vera samd om at ein ikkje snakkar om samferdslesaker sidan dei er så konfliktfylte, men meiner ikkje det er oppskrifta.

– Me må ta diskusjonen, så må me støtta kvart prosjekt utan å snakka ned andre, sa han, og mana rådslemene til å ha eit regionalt og ikkje eit lokalt perspektiv.

– Eg har tenkt at det som er bra for Odda eller Eidfjord, er bra for Kvam. Det som er bra for regionen, er bra for alle, sa Næss.

Les også: