Hardangerrådet får halvert administrasjon

Eitrheim vert pensjonist ved nyttår. Dimed sit i utgangspunktet berre konsulent Trude Rinaldo att som tilsett i regionrådet med kontor i Kinsarvik.

Etter ein hektisk prosess dei siste vekene der både rådet og styret, men av naturlege årsaker ikkje den vesle administrasjonen har vore involvert, vart det i eit digitalt møte sundag kveld klart at rådet frå no av berre skal ha éi stilling att. Ho vert lyst ut med det fyrste.

«Styreleiar og dagleg leiar startar prosess med omorganisering av Hardangerrådet IKS», heiter det i vedtaket. Rådet skal snarast setja opp «prioriterte oppgåver» for rådet.

– Naturleg tidspunkt

Rådsordførar Roald Aga Haug (Ap) frå Ullensvang seier til HF at tida er inne for å vurdera endringar når nokon seier seg opp. Bakgrunnen for nedskjeringa er at rådet går i minus for tida, samstundes som ein kraftig kostnadsauke, særleg med pensjon, er i venta. Om ein ikkje kuttar, må kommunane yta større tilskot, ifylgje Haug.

Han viser i tillegg til at Voss herad – og dimed gamle Granvin herad – har meldt seg ut av rådet. Alt i alt meiner rådet at det bør halda med éi heil stilling til å handtera arbeidsoppgåvene til rådet, seier Haug.

– Dei tilsette har gjort ein god jobb og hatt mange oppgåver, seier han.

Han utelukkar ikkje at det kan verta aktuelt med fleire prosjektarbeid i dei tilfella ein får tilskot til slike, slik ein til dømes gjer i regionrådet i Sogn. Også det rådet har berre éin tilsett, fortel Haug.

Ikkje heilt samde

Vedtaket om å omstilla seg til éi stilling vart gjort med to mot to røyster. Dobbelrøysta til rådsordførar Roald Aga Haug (Ap) vart avgjerande. Han fekk støtte av Kvam-ordførar og partifelle Torgeir Næss (Ap).

Jens Olav Holven (Sp) frå Ulvik og Timo Knoch (Ap) frå Eidfjord stilte seg bak eit framlegg frå sistnemnde om at styreleiar, dagleg leiar og rådsordførar skal starta ein prosess med omorganisering med tanke på «vidare drift og stillingsstorleik i administrasjonen». Dei ville altså ikkje presisera at utfallet skal vera berre éi stilling att.

Vedtaket seier òg at «struktur har vore tema for rådet i fleire møte», og at styret ynskjer ein oppdatert arbeidsplan som skal drøftast i eit arbeidsmøte med ordførarane snarast råd.

Tok si tid

Eitrheim fortel at han allereie 14. august varsla styret om at han ville slutta. Vel ein månad seinare leverte han den formelle oppseiinga. Likevel har det vorte noko hektisk dei siste vekene, mellom anna med eit digitalt møte sundag 10. desember. Stillinga vert lyst ut berre veker før Eitrheim går av.

Haug fortel at ein fyrst måtte avklara korleis og av kven saka skulle handsamast. I eit interkommunalt selskap som Hardangerrådet IKS er styret, ikkje sjølve rådet, arbeidsgjevar, påpeikar han. Såleis vart det nokre rundar med diskusjonar og litt att og fram mellom styret og rådet før avgjerda kunne takast, fortel rådsordføraren.

Eitrheim fortel til HF at han i utgangspunktet skal pensjonera seg. Planen er førebels å verta korkje bussjåfør eller trafikkdirigent, forsikrar han.