Hardangerbadet stengjer dørene
Etter dialog med styresmaktene vart avgjerda teken tysdag ettermiddag.
Badeanlegget i Øystese vert stengt frå og med onsdag, i fyrste omgang dei neste fire vekene, for å redusera risikoen for smittespreiing.
Det opplyser dagleg leiar Anita Storemark til HF tysdag ettermiddag. Ifylgje henne har saka i dag vore drøfta og vurdert i dialog mellom Hardangerbadet, Kvam herad og Folkehelseinstituttet.
Dei nye tiltaka som gjeld frå midnatt, inneber at badanlegg berre kan vera opne for individuell trening, skulebading, symjekurs og -trening, rehabilitering og opptrening og anna individuell behandling med timebestilling.
Dei fleste tilsette vert permitterte. Anlegget mistar omsetning i ein frå før pressa økonomisk situasjon. Ettersom skulebadinga skal gå sin gang, er det dårleg med mogelegheiter for å redusera energiforbruket, påpeikar Storemark.
– Me har fokus på planleggjng av komande sesong og gler oss. Det blir eit godt nytt år. Eg har trua! skriv ho til HF.
