Hardangerbadet kan få betre vilkår
Hardangerbadet bør få 2,1 millionar kroner meir i kommunalt tilskot i to år, meiner rådmannen. Kausjonistane må truleg punga ut også i år.
Det samla kommunale tilskotet vert 3,1 millionar kroner i året i 2023 og 2024 dersom heradsstyret er samd når saka vert avgjord 19.–20. juni. Tilskotet er i utgangspunktet om lag 1 million kroner, i tråd med vedtaket om kommunal deltaking i 2017.
Vel å merka går tilskotet formelt sett til Kvammabadet KF, men det vil indirekte betra resultatet til Hardangerbadet AS med den nemnde summen.
Pengane vil rådmannen henta i eit bufferfond på 10 millionar kroner som vart danna då Kvam herad i 2017 vedtok å delta i satsinga. Det er frå før redusert til 6,5 millionar kroner som fylgje av tidlegare tilskot løyvde i samband med underskot i drifta av badeanlegget.
Les også:
– Null utbyte
Den eventuelle auken er ikkje utan vilkår. Rådmannen føreslår å krevja at Hardangerbadet Eigedom AS, som eig ein del av lokala Hardangerbadet nyttar, kuttar husleiga med 1,1 millionar kroner i året. Dimed vil resultatet verta forbetra med i alt 3,2 millionar kroner i året. Dessutan vil rådmannen krevja at eigarane av selskapa ikkje tek ut utbyte i 2023–2024.
Også det store underskotet i fjor må handterast. Rådmannen føreslår å gje 2,1 millionar kroner til å dekkja det, på vilkår av at Hardangerbadet AS yter 1,1 millionar kroner og at kausjonistane nok ein gong yter til saman 1 million kroner.
Rådmannen vil i tillegg halda fram med kravet om at Hardangerbadet rapporterer om besøkstal og perioderekneskap annankvar månad.
Forma på telefon
Innstillinga er i tråd med eit framlegg som vart forma i ein telefonsamtale mellom ordførar Torgeir Næss og styreleiar Dag Jarle Aksnes i Hardangerbadet i mars.
Ifylgje rådmannen vil auken medføra at Kvam herad i alt yter kring 4,8 millionar kroner, medrekna renter og avdrag for eit lån på 22,8 millionar kroner og eit rentenivå på 4 prosent.
Auken i tilskot vil innebera at det vil verta mindre truleg at kausjonistane må punga ut for å gjera opp for underskot i år og neste år, påpeikar rådmannen. Det avheng av om Hardangerbadet får gode nok resultat til å gjera opp for seg overfor Kvammabadet KF.
Avtalen mellom Kvam herad og Hardangerbadet AS, som skal gjelda for fem år, skal partane tinga om som planlagt i 2024.
Yter meir enn fullmakta
Rådmannen fekk i vinter fullmakt til å auka tilskotet med inntil 1,5 millionar kroner frå Kvam herad i året, på vilkår av at huseigaren ytte like mykje. Auken ligg altså an til å verta høvesvis større frå heradet og mindre frå den private parten enn det dei folkevalde la opp til.
Rådmannen gjentek i saka at Kvam herad ikkje er forplikta til å dekkja ein del av underskotet i Hardangerbadet AS. Det har huseigaren hevda fleire gonger, seinast i eit styrevedtak i vår. I april vedtok styret å gå bort frå dette kravet og i staden gå med på å sjølv yta 1,1 millionar kroner – 400.000 mindre enn heradsstyrevedtaket i vinter tilsa – til både underskotsdekning i 2022 og husleigereduksjon i år og neste år.
Ved nyttår hadde Hardangerbadet eit underskot på 1,4 millionar kroner i 2022 og eit samla udekt tap på 3,5 millionar kroner.
– Det er heller ikkje sannsynleg at 2023 og 2024 vil gå i balanse utan høgare inntekter eller lågare utgifter, skriv rådmannen.
Formannskapet drøftar saka 13.–14. juni.
